چیرۆکى کەوتنەخوارەوەى کۆپتەرەکەى هاتوچۆى سلێمانى

+964

ئەحمەد محەمەد- سلێمانى

سەنتەرى خێراى فریاکەوتنى سلێمانى روونکردنەوە لەبارەى کەوتنە خوارەوەى کۆپتەرەکەى هاتوچۆى سلێمانى و رەوشى بریندارەکان دەدات و دەڵێت: تەندروستیان جێگیرە.

سامان نادر، بەڕێوەبەرى سەنتەرى خێراى فریاکەوتنى سلێمانى بە 964ـى وت،”شەوى رابردوو ئۆتۆمبێلێک لە شاخى هەرووتە کەوتووەتە خوارەوە و بەهۆیەوە شۆفێرەکەى گیانى لەدەستدا، تیمەکانمان ئاگادارکرانەوە لە بوونى تەرمەکە، بەڵام بەهۆى سەختى شوێنەکە ناچاربووین تیمى فڕۆکەوانى ئاگادار بکەینەوە”.

وەک باسى دەکات، کاتێک کۆپتەرەکە گەیشتووەتە شوێنەکە، بەهۆى هەڵەیەکى تەکنیکى کەوتووەتە خوارەوە و ئەو ئۆتۆمبێلەى لەوێ بووە کۆپتەرەکەى گرتووەتەوە، بەڵام لە تیمى فڕۆکەوانییەکە سێ کەس هەبوون و دوانیان بریندارن کە یەکێکیان عەمید حوسێن فەیزوڵا، بەرێوەبەرى تیمى فڕۆکەوانى سلێمانییە.

سامان نادر، جەختیش دەکاتەوە کە تەندروستیان جێگیرە و دواى دڵنیابوونەوە، رەوانەى ماڵەوە دەکرێنەوە.

پێداچوونەوە: وریا فەتاح