لە ناحیەی سلێمان بەگی خورماتوو
سەگی بێلانە پەلاماری مریشکی دا و 20یانی مردار کردەوە
964+
سیروان خورشید – دوزخورماتوو
لەناحیەی سلێمان بەگی سەر بەقەزای خورماتوو چەند سەگێکی بێلانە پەلاماری ژمارەیەک مریشکی ماڵی جوتیارێکیان داوەو 20 سەر مریشکیان مردارکردووەتەوە.
جومعە عەبدوڵا، جوتیار و خاوەن مریشکەکان بە964ـی وت، جیاواز لە روژانی تر ئەم بەیانییە بەپەلە خۆم گەیاندە شوێنی بەخێوکردنی مریشەکانم، چونکە هەستم کرد هیچ دەنگێکیان لێوە نایەت، کە چووم تەماشا دەکەم سەرجەمیان مرداربوونەتەوە و بە پارچەپارچە کراوی جێهێڵراون و تەنیا یەک دانەیان بەساغی ماوەتەوە.
وتیشی، ماوەی چەندین ساڵە مریشک و ئاژەڵ و پەلەوەر بەخێودەکەم و هەر لەتەنیشتی ماڵەکەم شوێنی تایبەتم بۆ داناون، پێشتر سەگ پەلاماری ئاژەڵ و مریشک و پەلەوەرکانی داوم، زیانی وایان نەبووە، بەڵام ئەم جارەیان بەم شێوەیە هەموو مریشکەکانی لەناو بردم.
ئاماژەی بەوەشکرد، ماوەی چەند رۆژێکە بەهۆی گەرماوە دەرگای مریشکەکانم بەکراوەیی جێهێشتووە، ئەمشەو سەگی بێلانە بەهەلی زانیوە و پەلاماری داون و سەرجەمیانی لەناو بردووە، لەگەڵ ئەوەشدا سوپاس گوزارم بەکاری خوا، پێم وایە خوای گەورە بەشێوەیەکی تر قەربووم بۆ دەکاتەوە.
پێداچوونەوە: ژێوار خدر
