هیچ بەڵگەنامەیەکی پێ نییە
تەرمێکی نەناسراو لە خانەقین دۆزرایەوە
+964
راژان باجەڵان – خانەقین
لە نزیک سایلۆی خانەقین تەرمی کەسێکی نەناسراو ئەم بەیانییە لەناو ئاوێک لەوێدا دۆزرایەوە و لەلایەن پۆلیسی خانەقین و تیمی تەندروستی هێنرایە نەخۆشخانەی خانەقین.
دکتۆر شوان شاکر، بەڕێوەبەری نەخۆشخانەی خانەقین بە 964ی وت، هیچ بەڵگەنامەیەکی پێ نییە و تەنیا پانتۆڵێکی کابۆی لەبەرە، لە سێ شوێن لە گیانی برین هەیە، شوێنی لێدان لە نزیک ملی هەیە، زامێک لە سەری و سینگی سوور بووەتەوە، گومان دەکرێت دانیشتووی دەوروبەری کەلار بێت.
تەرمەکە ئاوی سیروان هێناویەتی و ئێستادا لە نەخۆشخانەی خانەقینە و رەوانەی پزیشکی دادی بەعقوبە دەکرێت.
پێداچوونەوە: ئەرسەلان عەبدوڵا
