دوو تاکسی لە سلێمانی
بێ بەرامبەر هاتوچۆ بە تووشبووانی شێرپەنجە دەکەن
964+
دیلان محەمەد – سلێمانی
دوو شۆفێری تاکسی لە سلێمانی بێ بەرامبەر هاتوچۆ بە نەخۆشانی نەخۆشخانەی هیوا دەکەن و لەسەر تاکسییەکانیان نووسیویانە “ئەم تاکسییە بۆ نەخۆشی خەستەخانەی هیوا بێ بەرامبەرە”
خالید عەبدوڵا، شۆفێری یەکێک لەو تاکسیانەیە بە 964ـی وت، ئەوان دەمێکە بێ بەرامبەر نەخۆشانی نەخۆشخانەی هیوا هاتوچۆ پێ دەکەن و چەند رۆژێکە بە لەزگە لەسەر دەرگای تاکسیەکانیان نووسیویانە.
وتیشی، ئێستا دوو تاکسین و چەند تاکسییەکی دیکەش بەنیازن ئەو کارە بکەن، بەمەبەستی زیاتر هاندانی هاوڵاتییان بۆ هاوکاری نەخۆشانی شێرپەنجە.
نەخۆشخانەی هیوا تایبەت بە تووشبووانی شێرپەنجە و نەخۆشییەكانی خوێن لە سلێمانی و رۆژانە سەردانیكەری زۆری هەیە.
پێداچوونەوە: ژێوار خدر
