دیمەنی دروستکردنی رێگا نوێیەکە - وێنە: سەرۆکایەتی شارەوانی سلێمانی
هەفتەیەکە خەریکن
لەبەشی سەرەوە رێگەیەکی دیکە بۆ چوونە هەواری شار دروست دەکرێ
964+
ئەحمەد مستەفا
لە بەشی سەرەوەی پارکی هەواری شار، ژمارەیەک دەروازە هەن بۆ داخڵبوون بە پارکەکە، لە یەکێک لەو دەروازانە رێگایەکی نوێ بۆ هاتوچۆی هاوڵاتییان دروست دەکرێ.
شارەوانی سلێمانی بەخۆی و ئامێر و کارمەندەکانی سەرقاڵی دروستکردنی رێگاکەن، هەواری شار تائێستا یەک دەروازەی سەرەکی هەیە.
ئەمڕۆ سێشەممە 24.6.2026، زەردەشت تۆفیق، وتەبێژی شارەوانی سلێمانی بە 964ی وت، هەفتەیەکە تیمەکانیان سەرقاڵی دروستکردنی رێگاکەن، و رێگاکەش دەکەوێتە بەشی سەرەوەی پارکەکە،کاری رێگاکەش پاکسازی، چەو رێژکردن و قیرتاوکردن پێک دێت.
جگە لەوەی لە هەندێک شوێن زێرابی لوولەیی دروست دەکرێ، هەندێک شوێنی رێگاکەش پێویستی بە پڕکردنەوە یان بڕین هەیە، کارمەندانی بەشی پڕۆژەکان و ئامێرەکانی شارەوانی سلێمانی ئەرکدار کراون بە تەواوکردنی.
پاركی هەواری شار، لەسەر رووبەری چوار هەزار و 400 دۆنم زەوی دروست كراوە، دەكەوێتە باكووری رۆژئاوای شاری سلێمانی، جگە لەوەی رووبەرێکی زۆری پارکەکە سەوزاییە، ناوچەکە بەرز و نزمی زۆری تێدایە و خاوەن چەندین سەرچاوەی ئاوی وەرزییە.
پارکەکە سەرەڕای ئەوەی بە دووەم گەورەترین پارک دادەنرێ لە رۆژهەڵاتی ناوەڕاست، زیاتر لە 3000 جۆر نەمام و گوڵی تێدا چێندراوە، سەرجەم خزمەتگوزارییەكانی بە سیستەمی ئەلیكترۆنی رێكخراون، ساڵانە دەیان هەزار گەشتیاری پارێزگای سلێمانی و دەوروبەری رووی لێ دەکەن.
