بزانە چى بە پارێزگار دەڵێن؟
دانیشتووانی چەند گوندێک لە قەرەباڵغی بازگەی چیمەن بێزاربوون
964
کاروان ساڵحی – کەرکوک
قەرەباڵغی ئۆتۆمبێلی بارهەڵگر لە بازگەی چیمەنی کەرکوک، کە بەهۆی پشکنینی سۆنارەوە دروستدەبێت، دانیشتووانی گوندی چیمەن و چەند گوندێکی دیکەی سنوورەکەی بێزارکردووە و ئەمڕۆ لەسەر رێگای سەرەکی کەرکوک – سلێمانی گردبوونەوە.
سید وەلی چیمەنى ، دانیشتووی گوندی چیمەنی سەروو، بە 964ـى وت،”شۆفێرانی بارهەڵگر بەچەند کاتژمێرێک سەر شەقامەکە دەگرن و رێگە نادەن بڕۆینە ناو گوندەکانمانەوە، ئەگەر بڕۆین تووشی رووداوی هاتووچۆ دەبین. ئۆتۆمبێلێکمان ئەگەر دوو کەسی تێدابێت، دەبێت یەکێکمان دابەزێتە سەر شەقامەکە و رێگەکە بکاتەوە تاوەکو ئۆتۆمبێلەکە دەربچێت”.
شاخەوان ئەحمەد، دانیشتوویەکی دیکەی گوندی چیمەن بە توڕەییەوە قسەى بۆ 964 کرد و وتى،” ئۆتۆمبێل هەیە چیمەنتۆی بارکردووە و دوو رۆژە لێرە گیریانخواردووە، ئەگەر بازگەى نێوان دوو وڵاتیش بوایە وا نەدەبوو”.
دەشڵێت: پارێزگاری کەرکوک بڕیاری چارەسەرکردنی بازگەکەی دابوو، بەڵام کوا؟، با بێت کاتژمێرێک لێرە رابوەستێت و ببینێت چى روودەدات.
پێداچوونەوە: وریا فەتاح
