نوێژی موسوڵمانان لە مەککە - وێنە: تۆڕی ئێکس
تەوافی ماڵئاواییش دەکەن
ئەمڕۆ حاجییان لە میناوە بەرەو مەککە بەڕێدەکەون
964+
ژووری هەواڵ
وەک بەشێک لە بەجێگەیاندنى رێوڕەسمەکانى حەج، ئەمڕۆ میوانانی ماڵی خودا لە میناوە دەگەڕێنەوە مەککە و تەوافی ماڵئاوایی بە دەورى کەعبەدا ئەنجامدەدەن کە دوا قۆناغى حەجە و دواتر حاجییان دەگەڕێنەوە وڵاتەکانی خۆیان.
رۆژى دووەمی جەژن، حاجییان بەردەوامبوون لە بەردبارانکردنى شەیتان و ئەمڕۆ بەر لە خۆرئاوابوون حاجییان لە میناوە دەگەڕێنەوە مەککە بۆ ئەنجامدانى سوڕانەوەى ماڵئاوایی بەدەورى کەعبەدا.
وەزارەتى ناوخۆى سعودیە داواى لە حاجییان کردووە پابەندبن بە خشتەى بە جێگەیاندنى ئەرکەکان و رێڕەوە دیاریکراوەکان بگرنەبەر بۆ هاتن و گەڕانەوە لە رێوڕەسمەکانى بەردباران و سوڕانەوە و هاتن و چوون لە نێوان سەفا و مەڕوا، کەلوپەل لەگەڵ خۆیان نەبەن بۆ رێوڕەسمى بەردبارانکردن و سوڕانەوە بە دەورى کەعبەدا.
بۆ حەجى ئەمساڵ زیاتر لە ملیۆنێک و 600 هەزار حاجى، لە وڵاتانى جیهانەوە روویان لە سعودیە کردووە و بە گوتەى بەرپرسانى ئەو وڵاتە ئەمساڵ بەراورد بە ساڵانى رابردوو کەمترین گرفت لە رێوڕەسمەکانى حەج هەبووە.
