ئەو شوێنانەی دەڕاسە نایگاتێ
جوتیارانی پشدەر بە ئامێرێکی سادە دەغڵودانیان دروێنە دەکەن
964+
محەمەد عەلی
سەردەمی داس و مەڵەغان نەما و ئامێرێکی سادە گەنم و جۆی جوتیاران دەدورێتەوە.
جوتیارانی پشدەر ئەمساڵ زیاتر دەغڵ و دانەکانیان بە ئامێرێک دەدورنەوە ئەرکی ئەوانی ئاسان کردووە، ئەو شوێنانەی دەڕاسە بۆ ناچێت و هەوراز و سەختە، ئەم ئامێرە بۆی دەچێت و کێڵگەی گەنم و جۆکان دەدوورێتەوە.
ئامێرەکە بچوکە و بە ئۆتۆمبێڵێکی تر دەیگوازنەوە ناو زەویەکان و کاری پێدەکەن، جوتیاران دڵخۆشن و دەڵێن، پشوتر بەداس و مەڵەغان گەنمەکانمان دەدوریەوە بەڵام ئێستا ئەم ئامێرە، ئەرکی ئێمەی ئاسان کردووە.
ئامێرەکە گەنمەکە دەدورێتەوەو دەیبەستێت دواتر جوتیاران لەخەرمانی دەدەن و کایەو دانەوێڵەکە جیادەکەنەوە.
نرخی ئەم ئامێرە نزیکی 60 گەڵایەو بۆهەر کاتژمێرێک کارکردن بڕی 40 هەزار دینار وەردەگرێت و کۆمەڵێک کەس بۆبژێوی ژیان کڕیویانە و کاری بە کرێ کاری پێدەکەن.
پێداچوونەوە: توانا نەقی
