لەلایەن فۆڕۆکەی عێراقی بە هاوکاری پێشمەرگە
چەند مۆڵگەیەکی داعش لەسنووری خورماتوو بۆردوومان کرا
+964
سیروان خورشید – دوزخورماتوو
بەفرۆکەی جەنگی عێراق و بە هەماهەنگی لەگەڵ هێزەکانی پێشمەرگە لە سنووری خورماتوو چەند مۆڵگەیەکی داعش بۆردوومانکران.
فڕۆکەی جەنگی عێراق نزیکەی دوو کاتژمێرە بەچڕی بۆردومانی مۆڵگە و حەشارگەکانی چەکدارانی داعشی لە گوندی تاوێرکەوەی ناوچەی داودەی سنووری خورماتوو دەستپێکردوە و ژمارەیەک چەکدار لەناوبراون و چەند بۆمبێکی چێندراویش لەنزیک هێزەکانی لیوای 16ـی پێشمەرگە تەقیونەتەوە.
موقەدەم حەمە چەوری فەرماندەی لیوای 731ـی هێزەکانی پێشمەرگە لەسنووری خورماتوو بە 964ـی وت، ھەماھەنگی لە نێوان ئەوان و سوپای عێراق ھەبووە و دوای چاودێری وردی چەکدارەکان و جموجۆڵەکانیان لەلایەن فرۆکەی f16ـی سوپای عێراقەوە لە کاتژمێر 5ـی ئێوارەی ئەمڕۆ مۆڵگە و حەشارگەکانی چەکدارانی داعش لەگوندی تاوێرکەوە لەرۆژهەڵاتی خورماتوو بۆردومان کران کە لەنێو مۆڵگەکاندا ژمارەیەک چەکداری داعشی لێبوەو سەرجەمیان کراونەتە ئامانج.
وتیشی، بەهۆی چڕی و بەهێزی بۆردومانەکەوە چەند بۆمبێکی چێندراوی بۆشایی ئەمنی نێوان هێزەکانی پێشمەرگە و سوپای عێراق تەقیونەتەوەو تائێستاش فڕۆکە بەسەر ئاسمانی ناوچەکەوە دەسوڕێتەوە و چاودێری وردی ئەنجامی بۆردومانەکەو زیانەکان دەکات.
پێداچوونەوە: توانا نەقی
