“سەرۆک پێرێز پەیامی بۆ ناردووین”

964+

عەبدولعەزیز خاڵند – هەولێر

سەرۆکی دەستەی هاندەرانی ریال مەدرید لە کوردستان دەڵێت، پەیوەندییان بە سەرۆكی یانەكە كردووە و ئەویش پەیامی بۆ ناردوون، دەشڵێت ئەوەی دەیەوێت ببێتە ئەندامی یانەكە، با پەیوەندییان پێوە بكەن.

رابەر زیاد گەنجێكی هەولێرە و ماوەیەكە لەگەڵ چەند گەنجێكی دیكە دەستەی هاندەرانی ریال مەدرید لە كوردستان دابمەزرێنن و چالاكی و كۆبوونەوەی وەرزشییان هەیە، جارجار لە كافێتریا و شوێنە گشتییەكان، بۆ بینینی یارییەكانی ریال مەدرید كۆدەبنەوە و جلی یانەكەش لەبەردەكەن.

رابەر زیاد بۆ 964 قسەی كرد و ئاشكرای دەكات، ئەوان دەستەیەكی فەرمیین و لینكیان لەگەڵ یانەكە و دەستەی فەرمیی هاندەرانی یانەكە هەیە.

هەروەها دەڵێت، لە سعودیە لە كۆبوونەوەی دەستەی هاندەرانی ریال مەدرید ل رۆژهەڵاتی ناوەڕاست، سەرۆكی یانەكە فلۆرێنتنۆ پێرێزیان بینیوە و پەیوەندییان دروست كردووە و ئەویش پەیامی بۆ هاندەرانی یانەكە لە كوردستان ناردووە.

“ئەوەی دەیەوێت ببێتە ئەندامی یانەی ریال مەدرید و دەستەی هاندەران، دەتوانین پەیوەندیمان پێوەبكات و كارەكەی بۆ جێبەجێ دەكەین، رابەر زیاد وادەڵێت.

سەرۆكی دەستەی هاندەرانی یانەی شاهانەی ئیسپانیا ئەوەش دەڵێت، وەرزی داهاتوو ریال مەدریدێکی جیاواز دەبینن و گۆڕانكاریی گەورە بەڕێوەیە.

پێداچوونەوە: ئەرسەلان عەبدوڵا