سلێمانی
كچێكی دوو ساڵان كەوتە ژێر ئۆتۆمبێلەکەی باوكی و گیانی لەدەستدا
964+
ئەحمەد محەمەد – سلێمانی
دوانیوەڕۆی ئەمڕۆ چوارشەممە، لەگەڕەكی بەختیاری سلێمانی باوكێك بە ئۆتۆمبێلەكەی كچە دوو ساڵانەكەی خۆی شێلا و دەستبەجێ گیانی لەدەست دا.
رووداوەكە بەجۆرێك بووە، لە بێ ئاگایدا رویداوە و باوكەكە لە حەوشەی ماڵی خۆیاندا بەگی داناوە، كچەكەی كردووە بەژێرەوە و هەر لە شوێنی رووداوەكەش گیانی لەدەستداوە.
سەركەوت ئەحمەد، وتەبێژی پۆلیسی سلێمانی بە 964ـی وت، رووداوەكە دوانیوەڕۆی ئەمڕۆ، لە گەڕەكی بەختیاری سلێمانی روویداوە، رووداوەكە لە نەزانیندا روویداوە و باوكەكە منداڵەكەی نەبینیوە، كە چووەتە ژێر ئۆتۆمبێلەكەی و شێلاویەتی.
وتیشی، منداڵەكە كچە و تەمەنی دوو ساڵانە و خێزانەكە دانیشتووی گەڕەكی بەختیارین لە سلێمانی.
سەركەوت ئەحمەد ئەوەشی خستەڕوو، رووداوەكە قەزاو قەدەر بووە، پۆلیسی سلێمانی لێكۆڵینەوەی لە رووداوەكە كردووە و پەڕاومان خستووەتە بەردەم دادوەر، بۆئەوەی بڕیار لەسەر رووداوەكە بدات.
پێداچوونەوە: توانا نەقی
