بۆ ئاسانکاری هاتوچۆ
ترافیکەکانی سەنتەری قەزای کۆیە هەڵدەگیرێت و دەکرێن بە فولکە
964+
گۆڤەند فەتاح – کۆیە
بە مەبەستی ئاسانکاری هاتۆچۆ و کەمکردنەوەی لۆد لە شەقامەکانی سەنتەری قەزای کۆیە، ترافیکەکانی ناوشار لە فولکەی گردی و فولکەی سەوز هەڵدەگیرێت کە ژمارەیان شەش ترافیکە.
لە مەیدانی ترافیکەکەدا فولکەی خولانەوە دروست دەکرێت بۆ ئەوەی ئۆتۆمبێل نەوەستێت و بەردەوام بێت لە رۆیشتن و قەرەباڵغی دروست نەبێت.
سەنگەر سەڵاح، بەڕێوەبەری هاتوچۆی کۆیە بە 964ـی وت، نەهێشتنی ترافیک لەو دوو شوێنە و دروستکردنی فولکە، ئامانج لێی ئاسانکردنی هاتوچۆی ئۆتۆمبێلە لە سەنتەری شارەکەدا و کەمکردنەوەی لۆد و قەرەباڵغی ئێواران و بەیانییانە، زۆر جار ترافیکەکان بەشێک بوون لە دروستبوونی جەنجاڵی و قەرەباڵغی، بۆیە بە مەبەستی زیاتر رێکخستنەوەی هاتۆچۆ ئێمە پۆلیسی هاتوچۆ لە فولکەکان جێگیر دەکەین.
وتیشی، “بڕیاری لابردنی ترافیکەکان لە لایەن لیژنەیەکەوە دراوە کە هۆبەی هاتوچۆی هەولێر و کۆیە و شارەوانیی کۆیەی تێدایە، گەر پێویست بکات ئەوان دەتوانن چاودێری شەقامەکان بکەن و بڕیاری هەڵگرتنی تەواوی ترافیکەکانی شار بدەن و کەموکوڕییەکان ببینن و تاوەکو چارەسەری بکەن.
ئەو دوو فولکەیەی کە دروست دەکرێت تازەنین و نزیکەی 20 ساڵ پێش ئێستاش فولکەی تێدا بووە، بەڵام لابراون بە هۆکاری دیزاین و ماستەرپلانی نوێی شارەکەوە، دیار نییە ئەمجارەش تا چەند ساڵی تر دەمێنێتەوە و لانابرێن.
پێداچوونەوە: توانا نەقی
