عەبدوڵا ئۆجەلان، سەرۆکى زیندانیکراوى پەکەکە _ وێنە: میدیا خۆجێییەکان
رەنگە لە ئیتاڵیا بژیت
“بەمنزیکانە ئۆجەلان ئازاد دەکرێت”
964+
شۆڕش قادری
بەقسەی محەمەد ئەمین پێنجوێنی سیاسەتمەداری کورد، دوای ئەوەی حکومەتی ئیتاڵیا رەگەزنامە و پاسپۆرتی بەخشییە، عەبدوڵا ئۆجەلان رێبەری زیندانیکراوی پەکەکە، بەمنزیکانە ئازاد دەکرێت و پێدەچێت بچێتە ئیتاڵیا بۆ سەرخستنی پڕۆسەی ئاشتی.
محەمەد ئەمین پێنجوێنی لە پەڕەی تایبەتی خۆی لە تۆڕی کۆمەڵایەتی فەیسبووک نووسینێکی بەناوی سوپرایزەکانی پڕۆسەی ئاشتی بڵاوکردووەتەوە و دەڵێت، “ئەوکاتانەی ئۆجەلان لە رۆما لە نەخۆشخانەیەکی سەربازیی دەستبەسەر بوو و پاش ماوەیەك گواستیانەوە بۆ شۆێنکی تایبەتی، لە بەردەمی نەخۆشخانەکەدا مەیدانێکی گەورە هەبوو، لەو گۆڕەپانەدا بەدەیان هەزار مرۆڤی کورد کۆبوونەوە و بەیانیان بە رێپێوان دەچوون بۆ بەردەم سەرۆکایەتی شارەوانی و ئەنجومەنی وەزیران و داوایان دەکرد کە پەناهەندەیی سیاسی بدرێت بە ئۆجەلان”.
ئاماژەی بەوەشکردووە، ئەوکات رۆژنامەکان و میدیای ئیتالیا بە مانشێتی گەورە دەیاننووسی، رووبارێك لە مرۆڤی کوردی دیاسپۆرا رژاونەتە شەقامەکانی رۆما و داوای پەناهەندیی ئۆجەلان دەکەن، بەڵام ئەوە ئێستا بە بڕیاری حکومەت و پەرلەمانی ئیتالیا رەگەزنامە و پاسپۆرتی ئیتاڵی بەخشرا بە ئۆجەلان.
بەباوەڕی ئێمە و بیرکردنەوەی تایبەتی خۆم، بەمنزیکانە ئۆجەلان ئازاد دەکرێت و لەوانەشە بچێتە ئیتاڵیا و لەوێ نیشتەجێ ببێ
پێنجوێنی دەشڵێت، “بەباوەڕی ئێمە و بیرکردنەوەی تایبەتی خۆم، بەمنزیکانە ئۆجەلان ئازاد دەکرێت و لەوانەشە بچێتە ئیتاڵیا و لەوێ نیشتەجێ ببێ، بۆ ئەوەی بتوانێ هەوڵەکانی بخاتەگەڕ بۆ سەرخستن و پێشکەوتنی پڕۆسەی ئاشتی”.
پەیامەكەی ئۆجەلان كاردانەوەی ئەرێنی لای كوردستانیان دروست كرد
