بیخۆنەوە بەبێ کێشە
لەبارەى ئاوى خواردنەوەى زاخۆ دڵنیایى دەدرێت
964+
شڤان عەبدوڵا – زاخۆ
فەرمانگەى ئاوى زاخۆ دڵنیایى دەدات لەبارەى ئاوى خواردنەوەى شارەکە و دەڵێت، لێڵبونى ئاوەکە کێشەى نییە، بەڵام تانکییەکانتان بشۆن.
ئاوى خابوری زاخۆ تاکە سەرچاوەی ئاوی خواردنەوە دانیشتوانى زاخۆیە کە لە تەنیشتییەوە دوو پڕۆژەى پاڵاوتنى ئاوەکە دانراون، بەهێزى 118 مەترسێجا ئاو بۆ تەواوى شارەکە دابین دەکەن.
بەهۆى بارانى چەند رۆژى رابردوو، ئاوى خابورى زاخۆ لێڵ بوو، ئەوەش گومانى لاى هاوڵاتیانى شارەکە دروستکرد کە خواردنەوەى مەترسیدارە .
964 کێشەکەى بردە بەردەم ئەندازیار ساڵح حەسەن، بەرێوەبەری گشتی ئاوی زاخۆ، ئەو بە 964ـى وت،”هەموو ساڵێک لەوەرزی بەهاردا بەهۆی زۆری بارانبارین ئاوی خابور لێڵ دەبێت، ئێمەش رێژەی کلۆر و کەرەستەی پاکردنەوە و فلتەرین زیاتر بەکاردێنن بۆ ئەوەی ئاوەکە بۆ خواردنەوە بێ کێشە بێت”.
دەشڵێت: ئاوەکە بۆ خواردنەوە کێشەى نییە، ئەگەریش ئاوەکە بە لێڵى گەیشت بە ماڵان با دوو دڵ نەبن، چونکە ئەوە بەهۆى زیادبوونى رێژەى کلۆرەوەیە.
داواش دەکات، ماڵان تانکییەکانیان پاکبەکەنەوە، چونکە بەشێکى لێڵییەکە ئەوەیە کە ماڵان بۆ ماوەیەکى زۆر تانکییەکانیان پاکناکەنەوە.
رووبارى خابوری زاخۆ بەدرێژایی 18 کیلومەتر بە زاخۆدا تێدەپەڕێت، پێشتر تەنیا بۆ خواردنەوە سودى لێدەبیندرا، بەڵام دواتر ئیدارەى شارەکە بەمەبەستی کۆگاکردنی ئاو و دروستکردنی کۆرنیشى گەشتیارى زاخۆ، پێنج پۆند لەسەر خابورەکە دروستکرد.
پێداچوونەوە: وریا فەتاح
