ئەمڕۆ كەشوهەوای جەژن باران و سەرما و بروسكەی تێدەكەوێت

964+

ئەرسەلان عەبدوڵا

كەشناسیی هەرێمی كوردستان پێشبینیی دەكات ئەمڕۆ پلەكانی گەرما 6 تا 8 پلە بەراورد بە دوێنێ نزم ببنەوە، بۆیە مەڵێن جەژنە و كەشەكەی خۆشە، ئاگاتان لێ نەبێت سەرماتان دەبێت و باشترە چاكەتێكی بەهاری لەبەربكەن، بۆ ژنانیش كراسی كوردی بە تەنیا بەس نییە و شتێكی دیكەش لەبەربكەن.

تەواوی ناوچەكانی هەرێمیش نیمچەهەور بێت لەگەڵ بەردەوامی تاوەباران و بروسكە، بۆ ناوچەكانی عێراقیش هەمان بارودۆخە.

ئەمڕۆ دووشەممە 31.3.2025 بەشی پێشبینییەكانی کەشوهەوا لە وەزارەتی گواستنەوە و گەیاندنی هەرێمی كوردستان، پێشبینیکراوى 48 کاتژمێرى داهاتووی بڵاوكردەوە.

سەبارت بە ئەمڕۆ كەشی ئاسمان بە گشـتى لە نێوان هەوری تەواو بۆ نیمچەهەور دەبێت لەگەڵ بەردەوامی دابارینی تاوەباران و بروسکە لە ناوچە جیاجیاکانی هەرێم، زیاتریش لە ناوچە شاخاوییەکان و سنووری رۆژهەڵات و پارێزگای سلێمانی کاریگەری دەمێنێ، پاشان بۆ کاتەکانی ئێوارە کەش سەقامگیر دەبێتەوە ئاسمان بۆ نیمچەهەور و پەڵەهەور دەگۆڕێت.

هەروەها خێرایى با لەسەرخۆ و مام ناوەند ( 10 – 20 )کم/س دەبێت، هەندێ کات چالاک دەبێت بۆ سەروی 30 کم/ک، ئاراستەكەشی بەرەو باشووری خۆرهەڵات بۆ باکووری خۆرئاوا دەگۆڕێت .

پلەکانی گەرما/ بەشێوەیەکی بەرچاو نزم دەبنەوە ( 6- 8 ) پلەی سیلیزی بەراورد بە تۆمارەکانی دوێنێ،

بەرزترین پلەکانی گەرمای پێشبینیکراو بە پلەی سیلیزی:

هەولێر : 22 پلەی سیلیزی

سلێمانی : 19پلەی سیلیزی

دهۆک : 19 پلەی سیلیزی

کەرکوک : 24 پلەی سیلیزی

زاخۆ:  18  پلەی سیلیزی

هەڵەبجە : 21 پلەی سیلیزی

سۆران : 17 پلەی سیلیزی

حاجی ئۆمەران : 11 پلەی سیلیزی

گەرمیان :23 پلەی سیلیزی.

هاوكات كەشوهەوای ناوچەكانی دیكەی عێراقیش بە هەمان شێوەی كوردستانە و كەشناسیی عێراق پێشبینیی باران و بروسكە و هەوای ساردی كردووە.

ئایا عێراق و كوردستان چۆن بەرەنگاری مەترسییەكانی گۆڕانی كەشوهەوا دەبنەوە؟