شۆفێرێک لە شێخان گیانی لەدەست دا

964+

هیڤی دێوالی – دهۆک

لە قەزای شێخان بەهۆی رووداوێکی هاتوچۆ شۆفێری پیکابێک گیانی لەدەستدەدات و تەرمەکەی رەوانەی پزیشکی دادی دهۆک کرا.

ئەمڕۆ پێنج شەممە 27.3.2025  لەسەر  چوارڕیانی قەزای شێخان شۆفێری ئۆتۆمبێلێكی پیکاب کۆنتڕۆڵی لەدەست دا و خۆی بە بارهەڵگرێکی شارەوانیی شێخان کێشا، شۆفێری پیکابەکە دەستبەجێ گیانی لەدەست دا.

دڵشاد محەمەد، وتەبێژی هاتوچۆی قەزای شێخان بە 964ـی وت، ئەمڕۆ لەسەر رێگای قەزای شێخان بۆ ناو سەنتەرەکە شۆفێری ئۆتۆمبێلێکی جۆری پیکاب کۆنتڕۆڵی لەدەست دا و خۆی بە بارهەڵگرێکی شارەوانی کێشا، کە خەریک ئاودانی داروباری نێوان شەقامەکان بوون، شۆفێری پیکابەکە بەهۆی سەختی برینەکەیەوە لە شوێنی رووداوەکە گیانی لەدەست دا.

وتیشی، تەرمی شۆفێرەکە رەوانەی پزیشکی دادی دهۆک کرا، كە ناوی عەبدال حاجی عەبدوڵایە و تەمەنی 61 ساڵە و دانیشتووی ناحیەی باعەدرێیە لە سنووری قەزای شێخان.

پێداچوونەوە: ئەرسەلان عەبدوڵا