بەشدارانی شەڕەکە دەستگیرکران
پەیامنێری 964: لە شەڕەکەی قەرەتەپە چەک و دار بەکارهێنراوە
964+
کاروان ساڵحی
پۆلیسی کەرکوک نزیکەی 18 کەسی لە بەشدارانی شەڕەکەی گوندی قەرەتەپەی رۆژئاوای کەرکوک دەستگیرکرد، کە ئەمشەو ئاڵۆزی لەنێوانیاندا دروست ببوو.
ئەوەشی یەکلاکردەوە، کە بەهۆی ئاڵۆزییەکەوە سێ کەس کوژراون و چوار کەسی دیکە برینداربوون، ئەوەش بە گوێرەی راگەیەندراوێک.
پەیامنێری 964 چووە نەخۆشخانەی ئازادی فێرکاری لە کەرکوک، کە بەهۆی شەڕ و ئاڵۆزی دوو هۆزەکەوە، بریندار و تەرمەکانی بۆ گوازرابوویەوە، ئەو تیمی پۆلیس و فریاکەوتنی بینیوە، سەرچاوەیەکی پزیشکی داد بۆی پشتڕاست کردووەتەوە، سێ کوژراو و چوار بریندار بە هۆبەی ئەوان و نەخۆشخانە گەیشتووە.
پۆلیس لەو راگەیەندراوەدا کە 964 بینیوویەتی دەڵێت، دوای ئەوەی لە گوندی قەرە تەپە شەڕ و پێکدادان روویدا دەستبەجێ فەرماندەی پۆلیسی کەرکووک بە یاوەری هێزێکی تاکتیکی و هێزی سوات چووەتە شوێنی رووداوەکە،
هێزەکان توانیوویانە، لە هەردوو لایەنی شەڕەکە نزیکەی 18 کەس دەستگیربکەن، وە دەست بەسەر ئەو چەکانە بگرن کە تەقەکانی پێ کراوە و پێشکەش بە دادوەری لێکۆڵینەوەی کەرکوک کراوە، بۆیە بەپێی مادەی 406 لە یاسای سزادان بڕیاری دەستگیرکردنیان دراوە.
