رێگەی خورماتوو - کفری داخراوە
داعش هێرشی كردەسەر سوپای عێراق و چەكدارێكیان خۆی تەقاندەوە
+964
سیروان خورشید – دوزخورماتووو
کەمێک پێش ئێستا ژمارەیەک چەکداری داعش ھێرشیان کردە سەر سوپای عێراق و رووبەڕووبونەوەی چڕ لە نێوانیان روویدا، رێگای نێوان خورماتوو و کفرییش داخراوە.
موقەدەم حەمە چەوری، فەرماندەی لیوای 32ـی هێزەکانی پێشمەرگە لە سنووری خورماتوو بە 964ـی وت، “ژمارەیەک چەکدار لە سنووری گوندی قوڕی چای لە نێوان خورماتوو و کفری، ھێرشیان کردووەتە سەر لیوای 88ـی فەوجی دووی سوپای عێراق و رووبەڕووبوونەوە روویداوە.
وتیشی، لە کاتی ھەڵھاتنی چەکدارەکان، چەکدارێکیان خۆی تەقاندووەتەوە یان بۆمبی چێنراو پێیدا تەقیوەتەوە، ئێستاش سوپای عێراق گەمارۆی چەکدارەکانیان داوە و رێگای نێوان خورماتوو – کفری داخراوە و هێزێکی زۆریش گەمارۆی ناوچەکەیان داوە.
حەمە چەوری هەروەها ئەوەشی باس كرد، كە ئەو چەكدارانە لە سنووری پەلكانە هاتوونەتە و هێرشەكەیان ئەنجامداوە.
پەلكانە دەكەوێتە رۆژهەڵاتی قەزای خورماتوو، نزیكەی 20 كیلۆمەتر لێیەوە دوورە.
پێداچوونەوە: ئەرسەلان عەبدوڵا
