هاوڵاتییەک لەسەر بانی ماڵێک کەوتەخوارەوە و گیانی لەدەست دا

964+

هێڤی دێوالی – دهۆک

لە سەنتەری شاری دهۆک هاوڵاتییەک لەسەر بانی ماڵێک کەوتە خوارەوە و گیانی لەدەست دا.

سەرچاوەیەک لەبەشی فریاکەوتنی نەخۆشخانەی ئازادی دهۆک بە 964ـی وت، “نیوەڕۆی ئەمڕۆ چوارشەممە 19.3.2025  پیاوێکی تەمەن 65 ساڵ کە لەسەر بانی ماڵێک کەوتبوە خوارەوە، بە برینداری گەینرایە نەخۆشخانەکەمان، سەرەڕای هەوڵ و تەقەلای کارمەندانی نەخۆشخانەکە، دوای چەند کاتژمێرێک بەهۆی سەختی برینەکەی گیانی لەدەست دا.

ئاماژەی بەوەش کرد، تەرمەکەی رەوانەی پزیشکی دادی دهۆک کراوە و پاش پشکنین رادەستی کەسوکاری دەکرێتەوە.

سەبارەت بەو رووداوە کیڤی بامەڕنی سەرۆکی سەندیکای بیناسازی و پارێزەری سەندیکای کرێکاران – لقی دهۆک بە 964ـی وت، تائێستا ئاگادار نەکراونەتەوە کە کرێکارێک لە کاتی کارکردن کەوتبێتە خوارەوە و گیانی لەدەستدابێت.

وتیشی، ئەو کەسەی گیانی لەدەستداوە، هاوڵاتی ئاساییە و هۆکاری کەوتنەخوارەوەکەشی ناشزانرێت.

964 زانیویەتی کە هاوڵاتییە ناوی حوسێن ئەحمەدە و دانیشتووی شاری دهۆکە.

پێداچوونەوە: شۆڕش قادری

کرێکارێک لە پڕۆژەیەکى نیشتەجێبوون کەوتە خوارەوە و گیانى لەدەست دا

دڕۆن لەسەربانى ماڵێک کەوتە خوارەوە