+964

ئەمەل ناجی – هەڵەبجە

لە دووەم رۆژی چالاکییەکانی یادی 37 ساڵەی کیمیابارانی هەڵەبجەدا، پێشوازی لە حەوت پایسکلسواری رۆژهەڵاتی کوردستان و ئێران کرا، کە لە دوێنێوە لە کرماشانەوە بە پاسکیل بەڕێکەوتبوون و ئەمڕۆ گەیشتنە مۆنۆمێنتی شەهیدان و تاجە گوڵینەی وەفایان لەسەر پەیکەری عومەری خاوەر دانا.

محەمەد ئەمینی، گەنجترین پایسکلسواری تیمەکە، کە خەڵکی پاوەیە بە 964ی وت: “ئەمە دووەم جارمە دێمە هەڵەبجە، سڵاوی خەڵکی رۆژهەڵاتی کوردستانمان هێناوە بۆ تەواوی خەڵکی کوردستان، بە ئامانجی بەشداریکردن لە یادی کیمیابارانی هەڵەبجە ئەو حەوت کەسە لە دوێنێوە بەڕیکەوتووین و ئەمڕۆش گەیشتینە هەڵەبجە”.

سیروس هیمەتی، یەکێکی دیکە لە پایسکلسوارەکان بە 964ی وت: “لەبەر رێزی شەهیدانی کیمیابارانی هەڵەبجە، لە کرماشانەوە هاتووین، لە دوێنێوە بەڕێکەوتووین و ئەمشەو لە هەڵەبجە دەمێنینەوە و سبەینێ دەگەڕێینەوە بۆ کرماشان”.

پێداچوونەوە: ئەرسەلان عەبدوڵا

"با لە یادی هەڵەبجەدا رێستۆرانتەکان گۆشت لێنەنێن"

964+

سیروان خورشید – دوزخورماتوو

ئیدارە و هێزە ئەمنییەکانی خورماتوو، بڕیاری دەستگیرکردنیان بۆ ئەو خاوەن دوکان و فرۆشگایانە دەرکرد، کە تەقەمەنی و ‌یارییە ئاگرینەکانیان هەیە و دیانەوێ بۆ رۆژانی جەژن بیانفرۆشن.

لیوا حوسێن عەلی، بەڕێوەبەری پۆلیسی گشتی دوزخورماتوو بە 964ـی وت، “بڕیارەکە لە سبەینێوە لەسەر سەرجەم فرۆشگا و دوکانەکانی قەزاکە جێبەجێ دەکرێت، کە کڕین و فرۆشتن بە کەرەستەی تەقەمەنی و یارییە ئاگرینەکان دەکەن و بۆ رۆژانی جەژن دەبنەهۆی مەترسی و بێزارکردنی خەڵک”.

داوایشی لە هاوڵاتیان کرد، هەر خاوەن فرۆشگایەکیان بینی کە ئەو مادانە دەفرۆشێت، دەستبەجێ هێزە ئەمنییەکانی لێ ئاگادار بکەنەوە.

بەقسەی لیوا حوسێن عەلی، هەر کاسبکارێک کڕین و فرۆشتن بەو مادانەوە بکات، جگە لە داخستنی دوکانەکەی، رێکاری یاسایی توندی بەرامبەر دەگیرێتەبەر، داواش لە دایک و باوکان دەکات، ئاگاداری منداڵەکانیان بن، لە رۆژانی جەژن یارییە ئاگرینەکان نەکڕن، بۆ ئەوەی رووداوی نەخوازراوی لێنەکەوێتەوە.

ساڵانە لەگەڵ نزیکبوونەوەی جەژن و بۆنەکان، بە سەدان دوکان و فرۆشگاکانی خورماتوو، تەقەمەنی و یارییە ئەگرینەکان کۆگا دەکەن و دەیانفرۆشنەوە بە منداڵان، ئەمساڵ جیاواز لەساڵانی پێشوو، ئیدارە و هێزە ئەمنییەکانی قەزاکە، دەستپێشخەرییان کردووە و هەڵمەتی دەستگیرکردنیان راگەیاندووە و دەیانەوێت لەو رێگەیەوە فرۆشتنی ئەو مادانە بنبڕ بکەن.

پێداچوونەوە: شۆڕش قادری

لە سنوری دوزخورماتو ژمارەیەک تەقەمەنی و پاشماوەی مەترسیدار لەناوبران