وەزیری شارەوانی داوای راپۆرت لە شارەوانییەكان دەكات

964+

ئەرسەلان عەبدوڵا

وەزارەتی شارەوانی و گەشتوگوزار دەڵێت، وەزیر بەدواداچوون بۆ كارەكانی پرۆسەی دابەشكردنی زەوی دەكات، بە تایبەتی لە هەولێر و دهۆک و سۆران و زاخۆ.

وەزارەتەكە لە راگەیاندراوێكدا دەڵێت، وەزیری شارەوانی و گەشتوگوزار ساسان عەونی، بەدواداچوونی ورد بۆ كارەكانی پرۆسەی دابەشكردنی زەوی لە سنووری هەولێر و دهۆك و سۆران و زاخۆ دەكات و سەرجەم شارەوانییەكانیش رادەسپێرێت تا 18ی ئەم مانگە، راپۆرتێكی تایبەت بە بەرەوپێشچوونی كارەكانیان ئامادە بكەن.

ئاماژە بەوەش كراوە، رۆژ دووشەممە 10.3.2025 وەزیری شارەوانی و گەشتوگوزار سەرپەرشتیی كۆبوونەوەیەكی تایبەت بە پرۆسەی دابەشكردنی زەوی كرد و وەزیر سەرجەم شارەوانییەكان راسپارد تا 18ی ئەم مانگە پێویستە راپۆرتێكی وردەكاری سەبارەت بە كارەكانی پرۆسەكە ئامادە بكەن و تێیدا بە وردی كارە ئەنجامدراوەكان و گرفتەكان و پێشنیارەكان بخەنەڕوو، بۆ ئەوەی پرۆسەكە بەبێ گرفت هەنگاوی باشتر بنێت و سەرجەم فەرمانبەران كە مەرجەكان دەیانگرێتەوە زەوی وەربگرن.

لە مانگی ئاداری ساڵی رابردوو سەرۆكی حكومەتی هەرێم فەرمانی دا زەوی بەسەر فەرمانبەردا دابەش بكرێت، پرۆسەكە دەستیپێكردووە و ناوی فەرمانبەرانی ژمارەیەك وەزارەت بۆ وەرگرتنی زەوی راگەیاندراوە، بەڵام هێشتا مامەڵەكان وەك پێویست دەستی پێنەكردووە.

دابەشکردنی زەوی بەسەر فەرمانبەران لە ئیدارەی سۆران کێشەی تێکەوت