10 كەس لە سلێمانی دەستگیركران

ئەرسەلان عەبدوڵا

فەرماندەیی هێزەكانی سنوور رایگەیاند، 10 كەس لە خاوەن رەگەزنامەی ئاسیایی جۆراوجۆر هەوڵیاندابوو لە سنووری پارێزگای سلێمانییەوە خۆیان بگەیەننە ناو هەرێمی كوردستان و عێراق، بەڵام دەستگیركران.

فەرماندەییەكە لە راگەیاندراوێكدا دەڵێت، رۆژی دووشەممە 17.2.2025 فەوجی دووی لیوای سنوور توانیویانە 10 كەس دەستگیر بكەن، كە خەڵكی وڵاتانی ئاسیان و بەنیازبوون بە رێگەی نایاسایی و قاچاغەوە لە سنووری پارێزگای سلێمانییەوە بێنە ناو خاكی هەرێم و عێراقەوە.

سەرچاوەكە دەڵێت، ئەو كەسانە دەستگیركراون و رێوشوێنی یاساییان بەرامبەر دەگیرێتەبەر.

هەرچەندە فەرماندەیی هێزەكانی سنوور ئاشكرای نەكردووە ئەوانەی گیراون خەڵكی چ وڵاتێكن، بەڵام پێدەچێت زیاتر خەڵكی وڵاتانی رۆژهەڵاتی ئاسیابن، كە بۆ كاركردن یان بۆ گەیشتن بە وڵاتانی دیكە دێنە هەرێمی كوردستان و عێراق.