سەیفوڵا حوسێن و کەلسوم سلێمانـی هاوسەری
لە رێی فڕۆکەخانەی سلێمانییەوە
ئەو هاوڵاتییەی دوای 28 ساڵ لە ئەفریقا دۆزرایەوە دەگەڕێتەوە کوردستان
964+
شۆڕش قادری
سەیفوڵا حوسێن ئەو هاوڵاتییەی ناحیەی سەروچاوەی دەڤەری راپەڕین، کە دوای 28 ساڵ لە بێسەروشوێنبوونی لە ئەفریقا دۆزرایەوە، رۆژی چوارشەممە دەگەڕێتەوە کوردستان و بە کەسوکاری شاد دەبێتەوە.
سەیفوڵا حوسێن لە پەیوەندییەکی تەلەفۆنیدا بە 964ـی وت، “مامەڵەی گەڕانەوەمان بۆ کوردستان تەواو بووە و خوا یار بێ، رۆژی چوارشەممە 19.2.2025 لەڕێی فڕۆکەخانەی نێودەوڵەتی سلێمانی دەگەڕێینەوە و شەوی چوارشەممە لەسەر پێنجشەممە بە کەسوکارم شاد دەبمەوە”.
ئاماژەی بەوەشکرد، لەگەڵ خۆی، هاوسەرەکەی بەناوی کەلسوم سلێمان و منداڵەکەشی دێنێتەوە.
پێشتر سەیفوڵا بە 964ـی وتبوو، “ساڵی 1996 چوومەتە ئێران، دوای چوار ساڵ مانەوە لەو وڵاتە چوومە دوبەی، لەوێشەوە رەوانەی سۆماڵ کرام و دواتر خۆم گەیاندە بەریتانیا، دوای چەند رۆژێک مانەوە لە بەریتانیا دیپۆرتی سۆماڵ کرامەوە، دواتر چوومە کینیا و لەوێشەوە بۆ ئۆگەندا، لە ساڵی 2003ـشەوە پەیوەندیم لەگەڵ کەسوکارم پچڕا و هیچ هەواڵێکمان لەیەک نەبوو”.
درەنگانی شەوی 15 لەسەر 16.11.2024، 964 وەک یەکەم میدیای کوردی هەواڵی پەیدابوونی سەیفوڵا حوسێنی لەزاری خدری برای بڵاوکردەوە.
