مانگرتوویەکی سلێمانی
بیرى بۆنى ماڵەکەم دەکەم و قاچەکانیشم ئیش ناکەن
964+
دیلان محەمەد- سلێمانى
پاکیزە حەمەدەمین یەکێک لە مانگرتووانى سلێمانى، بیرى بۆنى ماڵەکەى و منداڵەکانى و ئینجانەى گوڵەکان دەکات و خۆیشی ئێستا قاچەکانی کارناکەن.
ئەمڕۆ 12ـەمین رۆژى مانگرتنى 13 مامۆستا و فەرمانبەرى سنوورى سلێمانییە، تا دێت دۆخى تەندروستیان بەرەو خراپبوون دەڕوات.
پاکیزە حەمەدەمین، یەکێک لە مانگرتووانە و قسەى بۆ 964 کرد و دەڵێت،”باش نیم، قاچم سڕدەبێت و ناتوانم لەسەرى بڕۆم”.
پاکیزە بە چاوى پڕ لە فرمێسکەوە دەڵێت، “بیرى ماڵەوە دەکەم، بیرى منداڵەکانم، بیرى جلەکانم و بۆنى ماڵەوە و ئینجانەکانم دەکەم”.
جەختیش دەکاتەوە، بە بڕیارى بەکۆمەڵى هاوڕێیانى مانگرتوو، مانگرتنەکە دەشکێنن ئەگەر وەڵامى داواکارییەکانیان بدرێتەوە.
پێداچوونەوە: وریا فەتاح
