بۆردومانی دا*عش کراوە
بۆردومان جێگری والی کەرکوکی کوشت؛ پزیشک پێی زانیوە
964+
کاروان ساڵحی – کەرکوک
دوای دوو رۆژ لە بۆردومانکردنی کۆبونەوەیەکی چەکدارانی داعش لە ئەشکەوتێکی زنجیرە چیای حەمرین و کوژرانی ژمارەیەک لە چەکدارەکان، پشکنینی پزیشکی دەریخست یەکێک لە کوژراوەکان جێگری والی کەرکوکی ئەو رێکخراوەیە.
بۆردومانەکە فڕۆکەی جەنگی عێراق کردی و کۆبوونەوەیەکی چەکدارەکان بە ئامانج گیراوە.
ئەمڕۆ هەینی 10.1.2025، سەرچاوەیەکی بەرپرس لە فەرماندەیی ئۆپەراسیۆنە هاوبەشەکانی کەرکوک کە ویستی ناوی ئاشکرانەکرێت بە 964ــی وت، شەوی چوارشەممە ئەم هەفتەیە، دوای زانیارییەکی هەواڵگیری ورد و لە بۆردومانی فرۆکە جەنگییەکان بۆ سەر ئەو ئەشکەوتە شەش چەکدار کوژران.
دواتر هێزە ئەمنییەکان، چوونەتە ناوچەکە و دەست بەسەر شەش مۆبایل و چەند پشتێنێکی بۆمبرێژکراو و ژمارەیەک چەکی جۆراو جۆر و فلاش میمۆری و نارنجۆکی دەستی و کارتی مۆبایل و دوربیندا گیراوە.
سەرچاوەکە وتیشی، دوای توێکاری پزیشکی بۆ تەرمەکان دەرکەوت یەکێک لە تەرمەکان تەرمی، “ماهیر حەمد سەڵب عوبەيدیە” کە ناسراو به ئەبو عوبێدە، ئەو جێگری والی کەرکوکی چەکدارانی داعشە.
پێداچوونەوە: ئەحمەد مستەفا
