"جەنجاڵی کەم بووەتەوە و کارەکان باشتر رایی دەکرێن"
کارمەندانی هۆبەی پشکنینی ئۆتۆمبێل لە گومرکی باشماخ چوونە بینا تازەکەیان
964+
کامیار کەمال – پێنجوێن
بینا تازەکەی هۆبەی پشکنینی ئۆتۆمبێل لە گومرگی باشماخ تەواو بوو، ئەوەش جەنجاڵی و قەرەباڵغی ناو بەڕێوەبەرایەتییەکەی کەم کردووەتەوە و ئاسانکاری باشی بۆ راپەڕاندنی کارەکان کردووە.
شاخەوان بەکر بەڕێوەبەری گومرگی باشماخ بە 964ـی وت، “پێشتر کارمەندانی هۆبەی پشکنینی ئۆتۆمبێل لە بینای بەڕێوەبەرایەتییەکەمان دادەنیشتن و رۆژانە بەهۆی سەردانی خەڵکێکی زۆر، قەرەباڵغی دروست دەبوو”.
“ئێستا جێگاکەیان نزیکترە لە مەیدانی هاتنەناوەوەی ئۆتۆمبێل و ئاسانکاری بۆ هەردوولا کراوە و لەوێوە کارەکان باشتر رایی دەکرێن”، شاخەوان بەکر وای وت.
ئەوەشی خستەروو کە، جگە لە هۆبەی پشکنینی ئۆتۆمبێل، بەشی گەنجینە و بەشی پشکنینی گشتیش بینایان بۆ کراوە و رەنگە لە هەفتەی داهاتوودا بەشی پشکنینی گشتی بچنە ناو بینا نوێیەکەیان، بەڵام بینای بەشی گەنجینە نزیکەی %60ـی کارەکانی تەواو بووە و پێدەچێت بەهۆی وەرزی سەرماوە کەمێک کارکردن تیایدا دوابکەوێت.
شاخەوان بەکر ئاماژەی بەوەشکرد، بەتەواو بوونی ئەو بینا نوێیانە ئیتر کێشەی شوێنیان نامێنێت، جیاکردنەوەی بەشەکانیش کارئاسانییە بۆ خەڵک و جەنجاڵی لە بەڕێوەبەرایەتی گومرگی باشماخ چارەسەر دەکات.
پێداچوونەوە: شۆڕش قادری
بەڕێوەبەری گومرگی باشماخ هەواڵی ئاژانسێکی ئێرانی "بە ناڕاست" وەسفدەکات
