وێستگەی گەورەی كارەبا لە دوكانە و بەشێكی قەزاكە كارەبایان نییە

+964

ئەحمەد محەمەد – سلێمانی

بەهۆی تەقینی یەكێك لە كێبڵەكانی وێستگەی دوكان، بەشێكی قەزای دوكان و دەوروبەری بێ كارەبان، بەڕێوەبەری كارەبای دوكانیش دەڵێت، “دوو تیمی كارەبای سلێمانی خەریكی چارەسەركردنن”.

عەلی محەمەد، بەڕێوەبەری كارەبای دوكان بە 964ی وت، لە كاتژمێر 4:30 ی ئێوارەوە بەشێكی قەزای دوكان و دەوروبەری بێ كارەبان، بەهۆی تەقینی كێبڵی 33ی وێستگەی دوكانەوە، تیمەكانمان هەوڵیانداوە چارەسەری بكەن، بەڵام تائێستا نەتوانراوە كێبڵەكە چاكبكرێت و كارەبا بگەڕێننەوە بۆ قەزاكە.

وتیشی، شەش ڤیدەری ناوچەكە كارەبای پچڕاوە، كە هەریەك لە تەواوی دوكانی خوارەوە، كلكەسماق، قەمچوغە، مێرگەپان و ناحیەی سورداش بەهەموو گوندەكانییەوە بێ كارەبان.

ئاماژەی بەوەش كرد، هۆكاری تەقینی كێبڵەكە نادیارە، بەڵام كاتێك كارەبا كوژاوەتەوە تیمەكانی دوكان هەوڵیانداوە كارەباكە بگەڕێننەوە، لە ئەنجامدا كێبڵەكە تەقیوە.

“دوو تیمی هێڵەكان و وێستگەكانی كارەبای سلێمانی خەریكی چارەسەركردنی كێشەكەن، هەموو هەوڵێك دەدەین ئەمشەو كارەبا بگەڕێننەوە بۆ دوكان و دەوروبەری”، بەڕێوەبەری كارەبای دوكان وای وت.

پێداچوونەوە: ئەرسەلان عەبدوڵا