دانەشکردنی ئاو بە تەنکەر بەسەر مالەکانی گەڕەکی رزگاری تا تەواو بوونی کارەکانی نوێکردنەوەی تۆڕی ئاوی گەڕەکەکە وێنە: ئاوی هەولێر
لە هەولێر
تۆڕی ئاوی گەڕەکی رزگاری نۆژەن دەکرێتەوە
964+
ژێوار خدر
تۆڕی ئاوی گەڕەکی رزگاری هەولێر نۆژەن دەکرێتەوە، بەڵام تا تەواو بوونی کارەکانی پڕۆژەکە، دانیشتووانی گەڕەکەکە بێ ئاو نابن و بە تەنکەر ئاویان پێدەگات.
ئەمڕۆ هەینی 20.12.2024 بەڕێوەبەرایەتی ئاوی هەولێر رایگەیاند، دەستییانکردووە بە نۆژەنکردنەوەى تۆڕى ئاوى خواردنەوەى گەڕەکى رزگاری، بەهۆی کۆن بوون و پیس بوونی تۆڕی ئاوی هەر یەک لە گەڕەکەکانی کرێکاران، رزگاری و سەفینەوە.
دەشڵێت، پڕۆژەکە پێکهاتووە لە دانان و گۆڕینی تۆڕی ئاوی تەواوی گەڕەکەکە و بودجەکەی لەلایەن پارێزگای هەولێرەوە تەرخانکراوە.
روونیشیکردووەتەوە، لەم پڕۆژەیە بۆڕی پۆلی ئەثیلین 110 ملم بە درێژی هەزار و 500 مەتر بەکارهاتووە، ماوەی تەواوبوونی پڕۆژەکە 180 رۆژە و تا ئێستا زۆربەی کارەکانی تەواو بووە.
بەڕێوەبەرایەتییەکە ئاماژەی بەوەشداوە، کە 300 هاوبەشی ئاو لە پڕۆژەکە سودمەند دەبن وە لە کاتی ئەنجامدانی کارەکانی پڕۆژەکە ئاو بە تەنکەر بۆ بۆ مالەکانی گەڕەکەکە دەگوازرێتەوە لەلایەن تیمی سەرپەرشتیاری پڕۆژەکە وە.
