لە زاخۆ
شەربەتییان کڕی و ڤەیپ دەرچوو
964+
شڤان عەبدوڵا – زاخۆ
لە زاخۆ جگەرەی ئەلیکترۆنی لە پاکەتێکی شەربەتدا شاردرابووەوە و دەستی بەسەرداگیرا.
ئەمڕۆ هەینی 20.12.2024، گرتە ڤیدیۆییەک تایبەت بە 964 نێردراوە، تێیدا دەرکەوتووە کە خاوەن مارکێتێک شەربەتی بەچەند مێردمنداڵێک فرۆشتووە، دوای پشکنین دەرکەوتووە لەناو پاکەتەکەیدا ڤەیپ (جگەرەی ئەلیکترۆنی)ـی تێدایە و خاوەنی مارکێتەکە خۆیشی ئاگاداری ئەوە نەبووە.
سیروان ساڵح، خاوەنی مارکێتەکەیە بە 964ـی وت، “نرخی شەربەتەکە 250 دینارە، بەشێکییان فرۆشراون و ئەوانەی کە ماویشن لەلایەن لیژنەکانەوە گوازراونەتەوە و دەستیان بەسەرداگیراوە.
لەسەر ئەم بابەتە 964 پەیوەندی بە بەڕێوەبەری چاودێری بازرگانی زاخۆ کوڤان ئاڤدەل کرد، ئەو وتی، ”لیژنەیەکمان پێکهێناوە و سەردانی هەموو مارکێتێک دەکەین، هەر کامێکیان ئەو جۆرە بەرهەمەی هەبێت دەستیبەسەردا دەگیرێت و خاوەن بەرهەمەکەش رێووشوێنی یاسایی بەرامبەر دەگیرێتەبەر”.
پێداچوونەوە: ژێوار خدر
