“تا ماڵمان بە قوڕ نەگیراوە چارەسەری پردی سەدە بكەن”

+964

محەمەد عەلی ـ راپەڕین

پردێك هەیە لە ناحیەی سەنگەسەر بە ناوی پردی سەدە، مەترسی رووخانی لەسەرە و هاوڵاتییەكی ناحیەكە دەڵێ، تا ماڵمان بە قوڕ نەگیراوە عیلاجێكی لێ بكەن، بەڕێوەبەری چاککردنەوە و پاراستنی رێگاوبانی راپەرین خەمتان نەبێت مەترسی رووخانی نییە، مەگەر لافاوێكی زۆر بەهێز بێت.

پردی سەدە ماوەی زیاتر لە 50 ساڵە لە ناحیەی سەنگەسەر دروستکراوە، گوندەکانی بناری قەندیل و رێگای مەرزی حاجی ئۆمەران و رێگای ئیدارەی راپەڕین بەیەکەوە دەبەستێتەوە، هاوڵاتیانی سنوورەکە دەڵێن، پردەکە مەترسی رووخانی هەیە و پێویستە لەنوێ بۆیان دروست بکەنەوە.

سیروان رەسوڵ، دانیشتوی گوندی سەنگەسەرە، بە 964ـی وت، پردی سەدە لە ناحیەکەیان هاتوچۆی زۆری بەسەرەوەیە و گرنگە، بەڵام بەهۆی بوونی لافاو و ئاوی بەخوڕ، پردەکە جوڵاوە و درزی تێكەوتووە، مەترسی رووخانی هەیە و شوفێران و هاوڵاتیان بە ترسەوە بەکاری دەهێنن.

وتیشی، پردەكە لە ساڵانی حەفتاكانەوە دروستکراوە و زۆر کۆن بووە، داواکارین پێش ئەوەی رووداوی نەخوازراوی لێبکەوێتەوە لایەنی پەیوەندیدار نۆژەنی بکەنەوە.

لە بەرامبەردا تاریق خدر، بەڕێوەبەری چاککردنەوە و پاراستنی رێگاوبانی راپەرین بە 964ـی وت، “راستە پردەکە کۆنە و پێویستی بە رووخاندن و سەرلەنوێ دروستكردنەوە هەیە، هاوڵاتیانیش دڵنیا دەکەینەوە کە مەترسی رووخانی نییە، مەگەر لافاوی زۆر بەهێز لە ناوچەکەماندا رووبدات”.

“جگە لە پردی سەدە لە سەنگەسەر، حەوت پردی تر پێویستیان بە نۆژەنکردنەوە و دروستکردنەوە هەیە، سەرووی خۆمان ئاگادار کردووەتەوە و دوامان کردووە بەڵام تائێستاش هیچ جوابێکیان نەداوینەوە، سێ ساڵە داواکاری ئەم پردانە بەرز دەکەینەوە کە کولفەیەکی زۆریان ناوێت، بەڵام هیچ جوابێکیان بەئێمە نەداوەتەوە”، بەڕێوەبەری رێگاوبانی راپەڕین وای وت.

پێداچوونەوە: ئەرسەلان عەبدوڵا

سەرۆکى شارەوانى سەنگەسەر بە کەفالەت ئازاد کرا