كشتوكاڵی هەرێم هاوردەكردنی چەند سەوزە و میوەیەكی لە دەرەوە قەدەغە كرد

 964+
ئەرسەلان عەبدوڵا

بەڕێوەبەری گشتیی كشتوكاڵی هەولێر ئاشكرای كرد، وەزارەتی كشتوكاڵ چەند جۆرە سەوزە و میوەیەكی قەدەغەكردووە لە دەرەوەی هەرێمەوە هاوردە بكرێن، ئەمەش لە پێناو ساغكردنەوەی بەرهەمی جوتیارانی ناوخۆی كوردستانە.

هێمن سەیدموراد ئەمڕۆ شەممە 14.12.2024 بە 964ی وت، وەزارەتی كشتوكاڵی كوردستان بڕیاریداوە هاوردەكردنی چەند سەوزە و میوەیەك تا ماوەیەكی دیارینەكراو قەدەغە بكات، ئەوانیش، پەتاتە، قەرنابیت، خاس، كەلەرم و شێلم و چەند میوەیەك، لە ئێران و وڵاتانی دیكەوە هاوردە دەكرێن، ئەمەش لە پێناو بەبازاڕكردن و ساغكردنەوەی بەرهەمی جوتیارانی كوردستان، كە ئێستا پێگەیشتوون.

روونیشیكردەوە، ئەو بڕیارە تا ماوەیەكی دیارینەكراو جێبەجێ دەكرێت و كەی بەرهەمی خۆمانە كەمی كرد و پێویستی بازاڕی دابین نەكرد، بە شێوەیەكی ئاسایی رێگە بە هاتنی ئەو سەوزە و میوانە لە دەرەوە دەدرێت.

هێمن سەیدموراد ئاشكراشی كرد، ئەو جۆرە بڕیارانە تازەنین و هەركاتێك پێویست بووبێت لە پێناو بەرژەوەندی بەرهەمی ناوخۆیی و جوتیارانی كوردستان دراون و بەردەوامیش دەبن.

بەرزبوونەوەی نرخی دۆلار سەوزە و میوەی هاوردەی گران كردووە