ئەم بەیانییەش زرمەى لێهێنا
لە دواى رووخانى ئەسەدەوە ئیسرائیل 250 هێرشى ئاسمانى کردووەتە سەر سوریا
964+
وریا فەتاح
جارێکى دیکە ئەم بەیانییە، دەنگى تەقینەوەیەکى گەورە لە دیمەشق بیسترا و سەرچاوە ناوخۆییەکانى سوریا دەڵێن، ئیسرائیل لە یەکشەممەوە 250 هێرشى ئاسمانى بۆسەر سوریا ئەنجامداوە.
روانگەی سوری بۆ مافەکانی مرۆڤ بڵاوى کردەوە، لە دوو رۆژى رابردوو و بەدیاریکراوى دواى کەوتنى ئەسەد، سوپاى ئیسرائیل 250 هێرشى ئاسمانى لەسەرانسەرى سوریا ئەنجامداوە، بەتایبەت بۆ دامەزراوە سەربازى و جبەخانەکان.
روونیشى کردووەتەوە، هێرشەکانى سوپاى ئیسرائیل بە دیمەشق نەوەستاوە و زۆربەى پارێزگا و ناوچەکانى سوریاى گرتووەتەوە کە کراوەتە سەر فڕۆکەخانە، کۆگاکانى چەک و تەقەمەنى، سیستمى بەرگرى و کەشتى جەنگى و بەندەرى لازقییە و چەند دامەزراوەیەکى دیکە.
وەک ئەوەى روانگەى سورى بۆ مافەکانى مرۆڤ بڵاوى کردووەتەوە، هێرشەکان ئامانج لێى لەناوبردنى ئەو چەکانەیە کە لە کۆگان و ناوچە سەربازییەکان ماونەتەوە.
