فەرمانبەرانی مەخمور بەشداری کەمپەینێکییان کردووە وێنە: بەڕێوەبەرایەتی کۆچ و کۆچبەرانی هەولێر
لە کەمپەینێکی سێ رۆژیدا
فەرمانبەرانی مەخمور فێردەکرین رووبەڕووی کارەساتە سروشتییەکان ببنەوە
964+
ژێوار خدر
تیمی وەڵامدانەوەی خێرای بەڕێوەبەرایەتی کۆچ و کۆچبەران و وەڵامدانەوەی قەیرانەکانی پارێزگای هەولێر، کەمپەینی (REACH)ـی بۆ بەرزکردنەوەی ئاستی خۆڕاگری و هۆشیاری لە سەر ئاستی ماڵان لە کاتی کارەساتە سروشتییەکان لە قەزای مەخمور راگەیاند.
بەڕێوەبەرایەتی کۆچ و کۆچبەران و وەڵامدانەوەی قەیرانەکانی هەولێر لە راگەیاندراوێکدا رایگەیاند، کەمپەینی (REACH) بۆ ماوەی سێ رۆژ بەردەوام دەبێت و لە یەکەم رۆژیدا کە دوێنێ دووشەممە 9.12.2024 بوو، 50 کەس تێیدا بەشداربوون، کە پێکهاتبوون لە تیمی بەرەنگاربوونەوەی لافاو و کارمەندانی بەرگریی شارستانی و فەرمانبەرانی قەزای مەخمور.
دەشڵێت، لە ماوەی ئەو سێ رۆژەی کەمپەینەکەدا، چەند سیمینارێک لە بوارەکانی: بەرگریی شارستانی، سەرکردایەتیکردنی تیم، شلەژان و چارەسەرەکان و فریاگوزاری سەرەتایی پێشکەش دەکرێن، دەرفەتیش دەدرێت بە تەواوی بەشداربووان بە شێوەی پراکتیکی بابەتەکانی سیمینارەکە جێبەجێ بکەن.
