دیمهنى كێڵانى زه‌وى بۆ چاندنى زه‌وى له گوندی گورگەچیاى دەشتی شارەزوور له ناحیەی سیروان ... وێنه: سۆشیاڵ میدیاى SirwanLine
چونكه عێراق وه‌رگرتنى گه‌نمى كه‌مكردووه‌ته‌وه
ئه‌مساڵ جوتیارانى دەشتی شارەزوور بە نابەدڵی گه‌نم ده‌چێنن
964+
فه‌رهاد حه‌سه‌ن
له ده‌شتى شاره‌زوور ده‌ست به چاندنى گه‌نم كراوه، به‌ڵام وه‌كو ساڵانى رابردوو نییه، ئه‌ویش به‌هۆى ئه‌وه‌ى حكومه‌تى عێراق رێژه‌ى وه‌رگرتنى گه‌نمى هه‌رێمی كوردستانى كه‌مكردووه‌ته‌وه ئه‌وانیش دوودڵن له چاندنى گه‌نمێكی زۆر.
به‌پێی ئه‌و زانیارییانه‌ى كه كشتوكاڵى هه‌ڵه‌بجه به 964ـى داوه، ساڵى پار له سنوورى پارێزگاى هه‌ڵه‌بجه 86 هه‌زار دۆنم زه‌وى به گه‌نم چێندرابوو.
ستار مه‌حمود، به‌ڕێوه‌به‌رى گشتى كشتوكاڵى هه‌ڵه‌بجه به 964ـى راگه‌یاند، بڕیاره‌كه‌ى وه‌زاره‌تى كشتوكاڵى عێراق بۆ كه‌مكردنه‌وه‌ى وه‌رگرتنى رێژه‌ى گه‌نمى هه‌رێمى كوردستان كاریگه‌رى له‌سه‌ر داچاندنى گه‌نمى ئه‌مساڵ كردووه و كه‌متر له ساڵانى رابردوو ده‌چێندرێت.
وتیشی “هه‌ربه‌هۆى ئه‌م بڕیاره‌وه پێده‌چێت به‌شێك له جوتیاران له‌سنوورى هه‌ڵه‌بجه و شاره‌زوور گه‌نم نه‌چێنن”.
ئاماژه‌ى به‌وه‌شكرد، له‌رێگه‌ى تیمه‌كانیانه‌وه خه‌ریكی رووپێویكردنن بۆ گه‌نمى چێندراوى ئه‌مساڵ، بۆ ئه‌وه‌ى بزانن چه‌ند دۆنم داچێندراوه.
تاوه‌كو پارساڵ حكومه‌تى عێراق بڕى 700 هه‌زار تۆن گه‌نمى له جوتیارانى هه‌رێمی كوردستان وه‌رده‌گرت، به‌ڵام بۆ ئه‌مساڵ وه‌زاره‌تى كشتوكاڵ له به‌غدا بڕیاری كه‌مكردنه‌وه‌ى رێژه‌كه‌ى دا و وه‌رگرتنى 300 هه‌زار تۆن گه‌نمى له جوتیارانى هه‌رێمی كوردستان كه‌مكرده‌وه.
دەشتی شارەزوور، لە دەشتە هه‌ره گەورە و به‌ناوبانگه‌كانى هه‌رێمی كوردستانه جگە لە گەنم، چه‌ندین جۆرى دیكه‌ى به‌رهه‌مى كشتوكاڵى لێده‌چێندرێت و به‌رهه‌م ده‌هێندرێت.
عێراق له ساڵى داهاتوو 300 هه‌زار تۆن گه‌نم كه‌متر له جوتیارانى هه‌رێم وه‌رده‌گرێت
