20 رۆژە
رێگە نادرێت بەرهەمی كارگەكانی كوردستان لە بازاڕەكانی عێراق بفرۆشرێت
+964
دەشتی عارف ـ هەولێر
20 رۆژە هیچ کارگەیەکی کوردستان ناتوانێت بەرهەمی خۆی بگەیەنێتە بازاڕەكانی ناوەڕاست و خوارووی عێراق و حكومەتی عێراق لە بازگەكان رێگەیان لێدەگرن، خاوەن كارگەكانیش داوای چارەسەر لە حكومەتی هەرێمی كوردستان دەكەن.
سەیفەدین ئیبراهیم، خاوەنی کارگەیەکی بابەتی پاککەرەوەیە بە 964ـی وت، راگرتنی ئەو کارگانە سیاسین و هەر رۆژە و بەهانەیەکمان پێدەگرن، ئەوە جاری یەکەمیشیان نییه و مانگی ئەیلولیش بەهەمان شێوە مانگێک سنوورەکان داخران.
سەردار محەمەد، خاوەنی کارگەیەکی دیکەیە و بە 964ـی وت،هەرچی داواکاری هەبوو جێبەجێمان کردووە، بەڵام ئێستا دەڵێن مۆڵەتی عێراق دەربهێنن، وتیشی، “نەمزانیوە لەناو یەک وڵات کارگەیەک پێویستی بە دوو مۆڵەت هەبێت”.
محەمەد عولا خاوەن کۆمپانیایەكی دیكەیە و بۆ 964 وتی، لە هەر یەکە لە شارەکانی هەولێر، سلێمانی، دهۆک، هەڵەبجە، زیاتر لە دوو هەزار کارگە کێشەی ساخکردنەوەی بەرهەمەکانیان هەیە، چونکە لە %20ـی بەرهەمەکان بۆ ناوخۆ بەکاردەهێنرێت، ئەو لە %80یەی کە دەمێنێتەوە رەوانەی شارەکانی تری عێراق دەکرێت.
لێدوانی ئەو خاوەن كارگانە بۆ 964 لە كاتێكدا بوو، كە ئەمڕۆ ژمارەیەكی زۆری خاوەن كارگەكان لە هەولێر گردبوونەوە و داوایان كرد حكومەتی هەرێمی كوردستان بێتە پێشەوە و چارەسەری ئەو كێشەیە بكات.
پێداچوونەوە – ژوولی عەدنان
ژوورە بازرگانییەکان لە بەغدان و دەیانەوێ رێگری بازگەکان چارە بکەن
