“هەولێر بۆ پرۆسەی سەرژمێریی گشتی ئامادەیە”

964+

ئەرسەلان عەبدوڵا

پارێزگاری هەولێر رایگەیاند، هەموو ئامادەكارییەک بۆ بەڕێوەچوونی سەرژمێری كراوە و هەولێر بۆ بەڕێوەچوونی پڕۆسەكە ئامادەیە.

ئومێد خۆشناو پارێزگاری هەولێر ئەمڕۆ پێنجشەممە 14.11.2024 لەگەڵ بەڕێوەبەرایەتیى ئامارى هەولێر كۆبووەوە و دواتریش لە كۆنگرەیەكی رۆژنامەوانیدا رایگەیاند، “هەموو ئامادەكارییەک بۆ بەڕێوەچوونی سەرژمێری لە سنوورى پارێزگاى هەولێر كراوە و ئێستا هەولێر ئامادەیە بۆ بەڕێوەچوونی پڕۆسەكە”.

وتیشی، ئەو دڵەڕاوكێیەی سەبارەت بەڕێوەچوونی پڕۆسەی سەرژمێری لە ناوچە كوردستانییەكانی دەرەوەی ئیدارەی هەرێمی کوردستان هەبوو، ئێستا نەماوە و تێبینییەكان چارەسەر كراون و داوا لە خەڵكی ئەو دەڤەرانە دەكەین، كە ئێستا دانیشتووی هەرێمی كوردستانن، بۆ رۆژانی سەرژمێری بگەڕێنەوە ناوچەكانی خۆیان.

پارێزگاری هەولێر ئامادەیی پارێزگاشی بۆ هەموو هاوكاری و پاڵپشتییەك بۆ بەڕێوەبەرایەتیی ئاماری هەولێر دەربڕی و داوای كرد هەولێر لە بەڕێوەچوونی پرۆسەكە پێشەنگ بێت.

بڕیارە رۆژانی 20 و21ی ئەم مانگە، سەرژمێریی گشتیی لە عێراق و هەرێمی كوردستاندا بەڕێوەبچێت.

ئاماری هەولێر بۆ سەرژمێری پێویستی بە 6000 هەزار کارمەندە