نۆژەنکردنەوەی قوتابخانەى چنگیان لە شارباژێر...وێنە: پەڕەى بەڕێوەبەرى پەروەردەى شارباژێر
لە ژێر نۆژەنکردنەوەدایە
کێشەى قوتابخانەى چنگیان چارەسەر دەبێت
964+
وریا فەتاح
پەروەردەى شارباژێر کۆڵى نەدا، هەتا ئەو قوتابخانانەى پێویستیان بە نۆژەنکردنەوە بوو پێش وەرزى سەرما نۆژەنى نەکردنەوە، حەوت قوتابخانە نۆژەنکرانەوە و بەم هەینییەش قوتابخانەى چنگیان کون و کەلەبەرەکانى چاکدەکرێن.
لەتیف حوسێن، بەڕێوەبەرى پەروەردەى شارباژێر بە 964ـى وت” یەک دوو ژوورى قوتابخانەى چنگیان پێویستى بە نۆژەنکردنەوە بوو، دواى ئەوەى نوسراومان کرد، بودجەیەکمان لە وەزارەتى پەروەردە و داراییەوە دابینکرد بۆ نۆژەنکردنەوەى”.
وەک باسى دەکات، بەهۆى ئەوەى ئێستا کاتى دەوامە، رۆژانى هەینى و شەممە و شەوان کاردەکرێت بۆ نۆژەنکردنەوە بۆ ئەوەى دەوامى قوتابیان دوانەکەوێت.
“لە ماوەى رابردوودا شەش حەوت قوتابخانەمان نۆژەنکردووەتەوە، چەند قوتابخانەیەکى دیکەش پێویستیان بە نۆژەنکردنەوەیە و بیناکانى کۆنن، تەنانەت، ژمارەیەک قوتابخانە خراونەتە لیستى قوتابخانە مەترسیدارەکان”، لەتیف حوسێن واى وت.
روونى کردەوە، لە سنوورى پەروەردەى شارباژێر 100 قوتابخانە و ناوەندى پەروەردەیى هەیە، ساڵى رابردوو 30 ناوەندیان پێویستیان بە نۆژەنکردنەوە هەبوو، بەڵام لەمساڵدا نزیکەى هەشت قوتابخانە نۆژەنکراونەتەوە و بەردەوامیشن، ئەوە جگە لەوەى بە هەوڵى کەسى خۆیان ژمارەیەکى زۆریان نۆژەنکردوونەتەوە.
