خاوەن حەوزێکی ماسی بە یەکجار 4000 ماسی لێ مردار بووەوە

964+

راژان باجەڵان – خانەقین

بەهۆی تێکچوونی کارەباوە ‌چوار هەزار ماسی لە حەوزێکدا مرداربوونەوە و خاوەنەکەای لۆمەی کارەبای نیشتمانی دەکات.

لە گرتەیەکی ڤیدیۆییدا کە بۆ 964 نێردراوە، خاوەن حەوزێکی ماسی دەردەکەوێت کە زیاد لە چوار هەزار ماسیی مرداربووەتەوە.

هەزال زێدان خاوەنی حەوزەکەیە و بە 964ی وت، محەویلەی تایبەتی خۆی هەیە و هی حکومەت نییە و هەموو کارەکانی یاساییە، کرێی کارەباش بە حکومەت دەدات و کارەبای حەوزەکەی زیادەڕۆ نییە، بەڵام دوێنی یەکشەممە فەرمانگەی کارەبای خانەقین بەبێ هیچ ئاگادارکردنەوەیەک کارەباکەیان لێ کوژاندووەتەوە

لە بەرامبەردا خەلیل زەرگۆشی بەڕێوەبەری کارەبای خانەقین هەموو قسەکانی خاوەن حەوزەکەی رەتکردەوە و بە 964ی وت، بە هیچ شێوەیەک محەویلەی ئەو هاوڵاتییە دەستکاری نەکراوە و کێشەی کارەبا بە گشتی هەبووە، چەند کاتژمێرێک تیمەکانی چاککردنەوە خەریکی گەڕاندنەوەی کارەبا بوونە و خاوەن حەوزەکە دەبوایە باشتر ئاگاداری حەوزەکەی بوایە

خاوەن حەوزەکە لە لای خۆیەوە دەڵێت، “زیاد لە چوار هەزار ماسی لە حەوزەكەدا هەبوون، کە کێشیان لە نێوان یەک و نیو تا دوو کیلۆ دەبوو، بایی زیاتر لە 30 ملیۆن دینار بوو”.

ئەو جۆرە ماسییانەی مرداربوونەتەوە، بە بەردەوامی پێویستیان بە کارەبایە، بۆ ئەوەی نەمرن و گەورەببن و لە بازاڕەکاندا بیانفرۆشن، بەڵام تێکچوونی کارەبا هەموو رەنجی ئەمساڵی ئەم هاوڵاتییەی بەبادا.

پێداچوونەوە – ژوولی عەدنان

لە کەرکوک 707 حەوزی ماسی سەر زەوی و ژێر زەوی رووخێندراون