دیسان دەریای ئیجەیە
چوار هاوڵاتی عێراقی لە یۆنان خنكان و 15یش بێ سەروشوێنن
964+
ئەرسەلان عەبدوڵا
چەند هاوڵاتییەكی خەڵكی ناسڕییە لە باشووری عێراق، بە پەیامنێری 964یان لە شارەكە راگەیاند، كە چوار هاوڵاتیی شارەكە لە دەریای ئیجەی نێوان توركیا و یۆنان خنكاون و 15 كەسی دیكەشیان بێسەروشوێنن.
عادل بەدری هاوڵاتییەكی ناسڕییەیە و نزیكی ئەو گەنجانەیە، كە خنكاون، ئەو بە 964ی وت، ئەو هاوڵاتییانە بەنیازی گەیشتن بە ئەوروپا بوون و لە ئاوی دەریای ئیجە لە نزیك یۆنان خنكاون، دوای ئەوەی شەپۆلە بەهێزەكان بەلەمەكەی تێكشكاندوون.
وتیشی، چوار لەو گەنجانە گیانیان لەدەستداوە و خەڵكی ناسڕییەن، 15ی دیكەش بێسەروشوێنن و بەدوایاندا دەگەڕێن، جگە لەوە كەسوكاری ئەو چوار گەنجەی گیانیان لەدەستداوە، بەرەو توركیا چوون بۆ ئەوەی تەرمەكان وەربگرنەوە.
عەلی بەدری دەڵێت، ئەوەی جێی سەرسامییە تا ئێستا حكومەتی عێراق بێدەنگە و هیچ رێوشوێنێكی بەرامبەر چارەنووسی ئەو گەنجانە و نەگرتووەتەبەر.
دەریای ئینجە ساڵانە شوێنی گیانلەدەستدانی سەدان هاوڵاتیی عێراقی و وڵاتانی دیكەشە، كە بە ئامانجی گەیشتن بە ئەوروپا بەو دەریایەدا تێدەپەڕن.
ئیجە دەكەوێتە نێوان توركیا و یۆنان و دەیان چیرۆكی تراژیدی هاوڵاتیانی كورد و عێراقی تێدا نووسراوەتەوە و پێشناچێت وا زوو چیرۆكەكان كۆتاییەكیان هەبێت.
