سودانی هەر ئەمشەو گەڕایەوە بەغدا

964+

ئەرسەلان عەبدوڵا

سەرۆك وەزیرانی عێراق دوای سەردانێكی یەك رۆژە، ئەمشەو گەڕایەوە بەغدا.

نووسینگەی سەرۆك وەزیرانی عێراق محەمەد شیاع سودانی ئەمشەو “هەینی 1.11.2024” بڵاویكردەوە، سەرۆك وەزیران گەڕایەوە بەغدا و كۆتایی بە سەردانەكەی بۆ توركیا هێنا، كە تێیدا سەرۆكی توركیا رەجەب تەیب ئەردۆغانی بینی.

بەپێی راگەیاندراوێكی دیكەی نووسینگەی سودانی، كە ئەمڕۆ بڵاوكرایەوە، “ناوەڕۆکى کۆبوونەوەکەی نێوان سودانی و ئەردۆغان گفتوگۆکردن بووە لەبارەى دوایین پێشهاتەکانى ناوچەکە و پەرەسەندنى مەترسییەکان بۆسەر ئاسایش و سەقامگیرى کە لە لایەن قەوارەى “زایۆنییەوە” دروستبووە”.

ئەوەش خرابووەڕوو ئەردۆغان و سودانى، باسیان لە یەکخستنى هەڵوێستەکانیان کردووە و داوایان لە وڵاتانى عەرەبى و ئیسلامى و رێکخراوە نێودەوڵەتییەکان کردووە کە پاڵپشتى هەوڵەکان بکەن بۆ ئاگربەست و ئاسانکارى بۆ گەیاندنى هاوکارى، بۆ ئەو کەسانەى بەهۆى هێرشەکانەوە تووشى کێشە بوون.

هەروەها هەر لە کۆبوونەوەکەدا، پەیوەندى نێوان بەغدا و ئەنقەرە و رێگاکانى کاراکردنى یاداشت و لێکتێگەیستن و رێککەوتنە هاوبەشەکان، گفتوگۆى لەبارەوە کراوە.

سودانى و ئەردۆگان باسى چیان کرد؟