کۆمسیۆن کاتی کردنەوەی بنکەکانی دەنگدانی ئاشکرا کرد

964+

توانا نەقی

کۆمسیۆنی باڵای هەڵبژاردنەکانی عێراق هەردوو کاتی کردنەوەی بنکەکانی دەنگدانی تایبەت و گشتی لە هەرێمی کوردستان ئاشکرا کرد و لە کاتژمێڕ 7:00 بەیانییەوە دەنگدەران دەتوانن بچە سەر سندوقەکانی دەنگدان.

ئەمڕۆ دووشەممە، کۆمسیۆنی باڵای هەڵبژاردنەکان بڵاویکردەوە، تێکڕای هاوپەیمانیەتییەکان، لایەنەکان، کادیدان، چودێران و رۆژنامەنوسان ئاگادار دەکەنەوە لە کاتی کردنەوەی بنکەکانی دەنگدان.

دەشڵێت، لە رۆژی هەینی 18.10.2024 کاتژمێر 7:00ـی بەیانی تاوەکو 6:00ـی ئێوارە بنکە و سندوقەکانی دەنگدان کراوەدەبن بەڕووی تەنگەدەرانی تایبەت.

هەروەها رۆژی یەکشەممە 20.10.2024 لە کاتژمێڕ 7:00ـی بەیانی تاوەکو 6:00ـی ئێوارە بنکەو سندوقەکانی دەنگدان کراوە دەبن بە ڕووی دەنگدەرانی گشتیدا.

کۆمسیۆن ئاماژەی بەوەشکردووە، بە هیچ شێوەیەک پرۆسەی کاتی دەنگدان درێژ ناکرێتەوە و لە کاتی خۆیدا بنکەکان دادەخرێن، بەهۆی ئەوەی کردنەوە و داخستنی وێستگەکانی دەنگدان بە شێوەی ئەلیکترۆنی دەبێت.

دەنگدان تەنیا لە رێگەی کارتی بایۆمەتری دەنگدەرەوە دەبێت و بەهیچ شێوەیەکیش رێگا نادرێت دەنگدەر مۆبایل و کامێرا بباتە ژوورەوە بۆ ناو وێستگەکانی دانگدان، تەنیا لەو بنکانە نەبێت کە بۆ رووماڵی رۆژنامەنوسان دیاری کراوە.

ئەمڕۆ دواڕۆژە بۆ وەرگرتنەوەی كارتی دەنگدان