چێشتخانه و خزمه‌تگوزارى جیاوازى تێدایه
دواى 15 ساڵ وه‌ستان شه‌مه‌نده‌فه‌ره‌كه‌ى ئه‌نبار كه‌وته‌وه كار
964+
فه‌رهاد حه‌سه‌ن
دواى وه‌ستانى بۆ ماوه‌ى نزیكه‌ى 15 ساڵ، هێڵى ئاسنینى پارێزگاى ئه‌نبار دواى نۆژه‌نكردنه‌وه و رێكخستنه‌وه‌ى یه‌كه‌مین گه‌شتى شه‌مه‌نده‌فه‌ره‌كه‌ى له رومادییه‌وه بۆ به‌غدا به‌ڕێخست.
كاتژمێر 6:00ـى سه‌رله‌به‌یانى ئه‌مڕۆ هه‌ینى گه‌شته‌كه‌ى ده‌ستپێكردووه، 350 سه‌رنشین ده‌گرێت، بلیتى هه‌ر سه‌رنشینێك پێنج هه‌زار دیناره، بڕیاریشه هه‌ر ئه‌مڕۆ له كاتژمێر 3:00ـى دواى نیوه‌ڕۆ بگه‌ڕێته‌وه ئه‌نبار و ئه‌و سه‌رنشینانه‌ى له‌گه‌ڵى ده‌گه‌ڕێنه‌وه بلیته‌كه‌یان ده‌بێته ته‌نیا چوار هه‌زار دینار.
له‌ناو شه‌مه‌نده‌فه‌ره‌كه چێشتخانه و خزمه‌تگوزارى جیاوازى تێداية ته‌نانه‌ت شوێنی VIp یشی بۆ سه‌رنشینیان هه‌یه كه نرخى بلیته‌كه‌ى به حه‌وت هه‌زار دیناره.
له‌یس ئیبراهیم فازڵ، كاپتنی شه‌مه‌نده‌فه‌ره‌كه به 964ـى راگه‌یاند، خۆشحاڵن به‌ده‌ستپێكردنه‌وه‌ى گه‌شته‌كانى شه‌مه‌نده‌فه‌ره‌كه و یه‌كێكه له پڕۆژه گه‌روره‌كانى گواستنه‌وه‌ى هاوڵاتیان له‌نێوان پارێزگاكاندا.
