لە دوبز سەگە بێلانەكان ناكوژرێن و كۆدەكرێنەوە

964+

ئەرسەلان عەبدوڵا

لەگەڵ ئەوەی لە قەزای دوبزی سەر بە كەركوك سەگە بێلانەكان ناكوژرێن وەك شارەكانی دیكەی عێراق، بەڵكو كۆدەكرێنەوە و دەبرێنە شەڵتەرێك بۆ ئەوەی لەوێ بژین، بەڵام وەك ئەوەی 964 تێبینیی كردووە، ئەو كەسانەی سەگەكان كۆدەكەنەوە، ئەزموونیان كەمە و بە شێوازێكی توندوتیژ مامەڵە لەگەڵ سەگەكان دەكەن و زۆر ئەزیەتیان دەدەن.

چەند ساڵێكە لە كەركوك و دەوروبەری سەگە بێلانەكان ناكوژرێن، بەڵكو كۆیان دەكەنەوە و دەیانبەن بۆ ناحیەی لەیلان، لەوێ شەڵتەرێك هەیە و سەگەكان لەوێ دەژین.

بەڵام ئەوەی 964 بینیویەتی و لە رێگەی چەند گرتە ڤیدیۆییەك پشتڕاستی دەكاتەوە، ئەو كارمەندانەی سەگەكان كۆدەكەنەوە، مەشقپێكراو و شارەزا نین و كاتێك سەگەكان دەگرن و دەیانگوازنەوە، زۆر ئەزیەتیان دەدەن و جار هەیە دەگاتە رادەی خنكاندن، تا سواری بارهەڵگرەكانیان دەكەن، چونكە تەل و وایەری كارەبا بەكار دەهێنن.

سەرۆكی شارەوانیی دوبز مەریوان عەلی بە 964ی وت، لەسەر سكاڵای هاوڵاتیان بەهۆی زۆربوونی سەگە بێلانەكان لە ناو بازاڕ و گەڕەكەكانی دوبز، هەڵمەتێكیان بە هاوكاری قایمقایەتی كەركوك بۆ كۆكردنەوەی سەگە بێلانەكان ئەنجامدا و دوای كۆكردنەوەیان دەیانێرن بۆ شەڵتەرێك لە قەزای لەیلان (قەرە حەسەن).

وتیشی، بەهۆی دەستپێكردنەوەی خوێندن، منداڵان لە كاتی چوونیان بۆ قوتابخانە، مەترسیی ئەو سەگانەیان لەسەرە و لەسەر داوای هاوڵاتیان هەڵمەتی كۆكردنەوەیانمان دەستپێكرد”.

لە رانیە سەگە بێلانەکان کۆدەکرێنەوە