دیدارێكی پێشووی نێوان هه‌ردوو یانه فۆتۆ: سۆشیال میدیا
ریال هه‌ڕه‌شه له ریال ده‌كات
964+
ئه‌رسه‌لان عه‌بدوڵڵا – هه‌ولێر
له یاریی لووتكه‌ی گه‌ڕی 19ـی خولی پله یه‌كی ئیسپانیا، هه‌ردوو یانه‌ی ریال مه‌درید و ریال سۆسیداد، كه له پله‌كانی دووه‌م و سێیه‌می ریزبه‌ندین، رووبه‌ڕووی یه‌كتر ده‌بنه‌وه.
لووتكه‌ی یارییه‌كانی ئه‌مڕۆی خولی ئیسپانیا له نێوان هه‌ردوو یانه‌ی ریال مه‌درید و ریال سۆسیداده، كه ئه‌مشه‌و له یاریگه‌ی سانتیاگۆ بێرنابێو به‌یه‌كده‌گه‌ن.
ریال مه‌درید له پله‌ی دووه‌مه به 41 خاڵ، ریال سۆسیداد له پله‌ی سێیه‌مه به 38 خاڵ، بۆیه هه‌ر ئه‌نجامێكی خراپ، هه‌ڕه‌شه‌یه له‌سه‌ر پێگه‌ی ریال مه‌درید، له كاتێكدا یانه‌ی شاهانه ده‌یه‌وێت پله‌ی یه‌كه‌م له بارسێلۆنا وه‌ربگرێته‌وه.
سه‌باره‌ت به یارییه‌كه‌ی ئه‌مڕۆ، کارلۆ ئانچیلۆتیی ئیتالی، راهێنەری یانەی ریال مەدرید، دووپاتی کردەوە، تیپەکەی شێوازێکی دیاریكراوی یاریکردنی نییە، ناسنامەیەکی روونی لە تۆپی پێدا نییە.
وتیشی، “ریال سۆسیداد بە شێوەیەکی جیاواز یاریی دەکات، پێویسته ئێمه ئاستی خۆمان له گێمی یه‌كه‌می یارییه‌كاندا باشتر بكه‌ین”.
خشته‌ی یارییه‌كانی ئه‌مڕۆی لالیگا:
ڤایادۆلید – ڤالێنسیا 16:00
ئۆساسۆنا – ئاتلێتیكۆ مه‌درید 18:15
سێلتاڤیگۆ – ئاتلێتیك بیلباو 20:30
ریال مه‌درید – ریال سۆسیداد 23:00.
جێی ئاماژه‌یه شه‌وی رابردوو بارسێلۆنا به 1-0 گۆڵ له جیرۆنای برده‌وه و ئێستا به 47 خاڵ له پله‌ی یه‌كه‌می ریزبه‌ندییه.