عێراق چوون و مانەوەی لای نەخۆشی لە نەخۆشخانەکان کرد بە پارە

964+

سیروان خورشید – دوزخورماتوو

بە بڕیاری وەزیری تەندروستی عێراق، لە بەرواری 2024.10.1 بەدواوە، چوون و مانەوە لە نەخۆشخانە و بنکە تەندروستییە حکومییەکان و لەنێویاندا قەزای دوزخورماتوو دەبێت بە پارە، ناشبێ جگەرە بکێشرێت.

بڕیارەکە وەزیری تەندروستی عێراق دەری کردووە، سەرجەم شارەکانی عێراق دەگرێتەوە و پابەندکراون تەنیا لە دوو رۆژدا چوون بۆ لای نەخۆش بێ بەرامبەر دەبێت.

محەمەد ئەگبەر، بەڕێوەبەری کەرتی تەندروستی سەڵاحەدین بە964ـی وت، “بەپێی بڕیارەکە سەردانیکردنی نەخۆشێک لە نەخۆشخانە، بڕی پێنج هەزار دینار وەردەگیرێت و مانەوەش لای نەخۆش بڕی 10 هەزار دینار وەردەگیرێت و ئەگەر چەند رۆژێکیش بمێنتەوە، تەنھا یەکجار ئەو بڕە پارەیەی لێوەردەگیرێت”.

تەنیا، لە رۆژانی دووشەممە و چوارشەممە لەکاتژمێر 3:00ی ئێوارەوە تاوەکو 7:00ی ئێوارە، سەردانیکردنی نەخۆش بێ بەرامبەر دەبێت و رۆژانی ھەینیش، لەکاتژمێر 8:00 بەیانی بۆ 12:00ی نیوەڕۆ، سەردانیکردنی نەخۆش بێ بەرامبەر دەبێت.

بەڕێوەبەرەکەی کەرتی تەندروستی سەڵاحەدین وتیشی، “ئەو کەسانەی کە لەناو دامەزراوە تەندروستییەکان جگەرە دەکێشن، جا فەرمانبەر بێت یان سەردانیکەر یان نەخۆش، بە بڕی 10 هەزار دینار، سزا و غەرامە دەکرێن”، لەنوسراوەکەی وەزیری تەندروستی عێراقدا کە کۆپییەکی دەست 964 کەوتووە، لە رۆژی 2024.10.1 رێکارەکان جێبەجێ دەکرێت.

وەزیر روونی کردووەتەوە، “ئەو بڕە پارەیە بۆ ڕێکخستنی تەبەڵەی نەخۆشە وەردەگیرێت لەبری پێنج هەزار دینار، 10 هەزار دینار دەبێت و سەردانیکردنی بەشی فریاگوزاری بێ بەرامبەر دەبێت و سەردانیکردنی بنکە تەندروستییەکان هەزار دیناری تێدەچێت”.

پێداچوونەوە: ئەحمەد مستەفا

قەوزە و پاشەڕۆ یەخەی پڕۆژە ئاوەکەی دوزخورماتوو بەرنادەن