ئاوی لێهەدەقوڵێت
شکانی بۆرییەکی ئاو شەقامێکی تازە قیرکراوی کۆیەی هەڵوەشاندەوە
964+
گۆڤەند فەتاح – کۆیە
بۆرییەکی ئاوی خواردنەوەی پڕۆژەی حەمامۆک لە ناوەڕاستی شەقامی حەمامۆکی شاری کۆیە تەقی و ئاوی لێهەڵدەقوڵێ، ئەو شەقامە کەمتر لە مانگێکە قیرتاوکراوە، بەڕێوەبەرایەتیی ئاوی کۆیەش دەڵێت، ئاو لە هیچ گەڕەکێک نابڕێت و بە زوویی چاکی دەکەنەوە.
هۆگر کەیفی، بەڕێوەبەری ئاوی کۆیە، بە 964ـی وت، شکانی ئەو بۆریە ئاوە هیچ کاریگەرییەکی نابێ لەسەر بڕانی ئاوی گەڕەکەکانی کۆیە، چونکە ئەو بۆرییە ئاوە وەک یەدەگ وایە و تەنها بۆ باشترکردنی پاڵەپەستۆی ئاوە و هیچ کاریگەرییەک دروست ناکات.
جەختیش دەکاتەوە، ئەوان وەک بەڕێوەبەرایەتیی ئاو بە زووترین کات تیمەکانیان دەنێرین و چاکی دەکەنەوە.
وتیشی،”هۆکاری شکانی بۆرییە ئاوەکەش کارکردنی ئامێرەکانی قیرتاوکردن بووە لەو شەقامە، کە پەستانێکی زۆری لەسەر بۆرییەکە دروستکردبوو، شوێنی بۆرییەکەش بەرز بووە بۆیە بۆرییەی ئاوەکە شکاوە”.
هۆگر کەیفی:
رۆژانە بەڕێوەبەرایەتیى ئاوى کۆیە، تەنیا لە سەنتەرى شاردا 38 هەزار مەتر سێجا ئاوى خواردنەوە لەسەر 18 هەزار و 700 هاوبەشى ئاودا دابەش دەکات
پرۆژەی ئاوی حەمامۆک دەکەوێتە گوندی حەمامۆک، کە کانییەکی گەورەی لێیە و بەشێکی ئاوی گەڕەکەکانی کۆیە لەسەر ئەو پڕۆژەیەن، بەشی زۆری گەڕەکەکانی دیکەش لەسەر پڕۆژەی ئاوی بۆگدن.
پێداچوونەوە: ژێوار خدر
