هۆشداری لە بارەی جۆرێكی دەرمان لە بازاڕەكانی كوردستان دەدرێت

964+
ئەرسەلان عەبدوڵا

دامەزراوەی كۆنتڕۆڵی جۆریی دەرمان، هۆشداریی لە بارەی جۆرە دەرمانێك دا، كە بۆ درێژكردنی باڵا ریكلامی بۆ دەكرێت و دامەزراوەكە دەڵێت، مەترسیی گەورە لەسەر تەندروستیی بەكارهێنەر دروست دەكات.

دامەزراوەكە بڵاویان كردەوە، لە تۆڕە کۆمەڵایەتییەکان بۆ مەبەستی درێژکردنی باڵا بە چڕی ریکلام بۆ بەرهەمێکی ساختە دەکرێت بەناوی پاودەری هایت گڕۆوس – height growth  بۆ مەبەستی درێژکردنی باڵا، کە بەرهەمێکی ساختە و رێگەپێنەدراوە و ماددەی شاراوە و مەترسیداری تێدایە کە مەترسیی گەورە لەسەر تەندروستیی بەکارهێنەر دروست دەکات.

دامەزراوەی كۆنتڕۆڵی جۆریی دەرمان دەڵێت، هاوڵاتیان ئاگاداردەکەینەوە کە ئەو بەرهەمە لە وێبسایتە جیهانییەکانیش ریکلامی بۆ کراوه، خۆتان بەدووربگرن لە کڕینی، چونکە ئەو جۆرە وێبسایتە ئۆنلاینە گەورانە، بەردەوام لەلایەن دامەزراوەی خۆراک و دەرمان لە ئەمریکا و وڵاتانی پێشکەوتوو ئاگاداردەکرێنەوە کە ئەو بەرهەمانەی بە ئۆنلاین ریکلامیان بۆ دەکەن، ساختەن و پڕن لە ماددە و دەرمانی شاراوە و پێچەوانەی یاساکانی دەرمان و خۆراکن و کاریگەریی نەرێنی لەسەر تەندروستیی بەکارهێنەر دروست دەکەن.

هاوكات دامەزراوەكە رێنمایی بە هاوڵاتیانی كوردستان دەدات، كە بەرهەمی دەرمانسازی بۆ چارەسەرکردنی نەخۆشی و کێشەی تەندروستی لە رێگای راوێژی پزیشکی پسپۆڕ وەربگرن، دەرمانیش دوای راوێژی پزیشکی دەرمانساز لە دەرمانخانەکان بکڕن، تەنیا ئەو دەرمانانەش بەکاربهێنن، کە ستیکەری KMCA – وەزارەتی تەندروستیی حکومەتی هەرێمی کوردستانیان لەسەرە.

لەمەودوا لە مۆبایلەکەتەوە نرخ و کوالیتی دەرمان دەزانیت