بەرهەمێکی زیاتری هەیە لە چاو سماقی خۆماڵی
سماقە ئەڵمانییەکە لە باڵەکایەتی ناوازە دەرچووە
+964
ئاکام غەفور- سۆران
جوتیارێکی دەڤەری باڵەکایەتی جۆرە سماقێکی نوێی لە باڵەکایەتی چاندووە و دەڵێت، بەرهەمێکی باشی هەیە.
سماقەکە ئەڵمانییە و گوڵێکی سوور و جوانی هەیە و بەرێکی زیاتر دەگرێت، بەراورد بە سماقی خۆماڵی، بە هێشوو سماق دەگرێت و بۆ خاکی دێم و بەراویش دەگونجێت.
ئەیوب رشدوری، جوتیارێکی باڵەکایەتییە و خاوەنی سماقەکەیە، قسەی بۆ 964 کرد و وتی، “هەشت ساڵ دەبێت ئەو سماقەم چاندووە، ناوی سماقی ئەڵمانییە و بەرهەمەکە لەگەڵ خاکی کوردستان گونجاوە لە خاکی بەراو و دێمیش دەچێندرێت”.
ئەو جوتیارە باسی لەوەش کرد، سماقەکە لە چاو سماقی خۆماڵی بەرهەمێکی زیاتری هەیە و ساڵانەش زووتر پێدەگات و هەم لە رووی تامیشەوە ترشتر و هەم رەنگەکەشی سوورترە.
“سماقەکە گونجاوە لە خاکی ئێرە، بەڵام زیادکردنی شتڵ، کارێکی قورسە و بە زەحمەت شتڵی نوێی لێ بەرهەم دێت”، ئەیوب رشدوری وای وت.
پێداچوونەوە: ژێوار خدر
