رێگەى پێنجوێن بۆ سلێمانى
ئەم ئێوارەیە ژنێک گیانى لەدەست دا
964+
کامیار کەمال – پێنجوێن
لە رووداوێکى هاتوچۆدا کە ئێوارەى ئەمڕۆ لە ملەى نەڵمەى رێگاى نێوان پێنجوێن بۆ سلێمانى روویداوە، ژنێک گیانى لەدەست دا.
بەهمەن عەبدوڵا وتەبێژی پۆلیسی هاتوچۆی سلێمانی بە 964ـى راگەیاند، ئۆتۆمبێلەکە لە جۆری نیسان پاسفایندەر بووە و لە پێنجوێنەوە بەرەو سلێمانی رۆیشتووە و ژن و مێردێکی تێدا بووە.
وتیشی، لە هەورازەکەی ملەی نەڵمـە کۆنترۆڵی لە دەستداوە و کەوتووە و خوارەوە و لە ئەنجامدا ژنەکە گیانی لەدەستداوە و پیاوەکەش بە سەختی بریندار بووە.
باسی لەوەش کرد، ژنەکە تەمەنی 56 ساڵە و پیاوەکەش تەمەنی 58 ساڵە، کە ئێستا پیاوەکە چارەسەر وەردەگرێت.
بەپێى زانیارییەکانى پەیامنێرى 964، بەهۆى سەختى ئەو شوێنەى ئۆتۆمبێلەکەى لێ کەوتووەتە خوارەوە، تا ئێستا نەتوانراوە ئۆتۆمبێلەکە دەربهێنرێتەوە.
پێداچوونەوە: وریا فەتاح
