هەورامان- كوردستان- وێنە: سۆشیاڵ میدیا
لە هەورامان پێنج كۆڵبەر بریندار كران
+964
كوردستان ئەحمەد- هەولێر
لە سنووری پارێزگای كرماشان له رۆژهه‌ڵاتی كوردستان، سوپای پاسدارانی ئێران، دەستڕێژی گوللەی لە چەند كۆڵبەرێك كرد و پێنج كۆڵبەر برینداربوون.
لە سنوری گوندی نەوسود لە سەر سنووری نێوان رۆژهەڵات و باشوری كوردستان، هێزەكانی سوپای پاسداران دوێنێ تەقەیان لە چەند كۆڵبەرێك كردووه، له ئه‌نجامدا پێنج كۆڵبەر برینداربوون، كه برینی دووانیان سەختە.
ماڵپەڕی رێكخراوی هەنگاو بۆ مافەكانی مرۆڤ، ئەمڕۆ دووشەممە 23ی کانوونی دووەم بڵاویكرده‌وه، دۆخی تەندروستی بریندارەكان ناجێگیرە و لە چەند رۆژی رابردووشدا تەقە لە چەند كۆڵبەرێكی دیكه‌ش كراوە.
بەپێی ئاماری رێکخراوەکانی مافی مرۆڤ لە رۆژهەڵاتی کوردستان، ساڵی رابردوو 290 کۆڵبەری کورد لە سنوورەکانی کوردستان بە هۆکاری جیاواز بوونەتە قوربانی، کە 11 لە قوربانییەکان تەمەنیان له ژێر 18 ساڵان بووه، لە ماوەی ساڵی 2022شدا هێزەکانی ئێران 209 جار تەقەیان لە کۆڵبەران کردووە.